रामेछाप । खाँडादेवी गाउँपालिका–१ राकाथुम स्थित खैरेनीपुल नजिकै सुनकोशी नदीवाट बिहिवार मध्यरातको समयमा नदीजन्य सामाग्री चोरी निकासी गर्ने गिरोहलाई पालिका अध्यक्षले कोशी किनारबाटै रङ्गे हात पक्राउ गरेका छन् ।
मध्यरातको समय पारेर अवैद्य रुपमा सुनकोशी नदी किनारवाट बालुवा र ढुङ्गा निकासी गर्दै गरेको अवस्थामा खाँडादेवी गाउँपालिकाका अध्यक्ष ज्ञानकुमार श्रेष्ठ सहितको टोलीले नदीजन्य पदार्थ उत्खनन गर्न प्रयोग गरिएका २ वटा स्काइभेटर र ३ वटा टिफर नियन्त्रणमा लिएर आवश्यक कार्वाहीको लागि इलाका प्रहरी कार्यालय चोप्राङ्गलाई बुझाएको छ ।
रातीको समय पारेर तस्करहरुले अवैद्य रुपमा ढुङ्गा, गिट्टी र बालुवा चोरी निकासी गर्ने गरेको सूचनाको आधारमा पालिका अध्यक्ष सहितको टोलीले अनुगमन गर्ने क्रममा वालुवा उत्खनन गर्दै गरेको अवस्थामा स्काईभेटर र टिफर नियन्त्रणमा लिएको हो । नदीजन्य पदार्थ रातारात चोरी निकासी हुँदै आएको छ भन्ने सूचना कोशी किनारमा वसोवास गर्ने नागरिकहरुले आफुलाई दिएपछि केही साथीहरु सहित आफु राती कोशी किनारमा पुग्दा चोरी निकासी भइरहेको फेला पारेको खाँडादेवी गाउँपालिकाका अध्यक्ष ज्ञानकुमार श्रेष्ठले जानकारी दिए ।
उनले भने– सूचनाको आधारमा मसँग पालिका केही कर्मचारी र प्रहरी सहित राती कोशी किनारमा पुगेका थियौं । अवैद्य रुपमा उत्खनन भइरहेको ठाउँमा हामी पुग्दा टिफर र स्काईभेटरका चालक र सह–चालक फरार भए । चालक र सह–चालक घटनास्थलवाट फरार भएपछि उक्त स्थानमा छाडिएका स्काईभेटर र टिफर आवश्यक कारवाहीको लागि प्रहरीको जिम्मा लगाइएकोे छ । उनीहरुलाई स्थानिय स्वायत्तशासन अनुसार कारवाही गरेरै छाड्ने अध्यक्ष श्रेष्ठले बताए ।
सुनकोशी नदी पारिपट्टी सिन्धुली जिल्ला तर्फ विपी राजमार्ग रहेको छ । वारीपट्टी रामेछाप तर्फ मध्यपहाडी राजमार्ग निमार्णाधिन अवस्थामा रहेको छ । रातीको समयमा तस्करहरुले कोशी तटिय क्षेत्रमा वसोवास गर्दै आएका बस्तीहरु नै असुरक्षित हुने किसिमले अवैद्य रुपमा वालुवा उत्खनन गर्ने गर्दा एकातिर वस्ती जोखिममा परेको छ भने अर्कोतिर मध्यपहाडी राजमार्गको सडक समेत पहिरोको जोखिममा परेको छ ।
नदीजन्य सामाग्रीको उत्खनन् गर्न गाउँपालिकाले इआइए गरेको स्थानमा मात्रै गर्नुपर्ने, उत्खनन् गर्दा ठूला जेसिभी प्रयोग गर्न नपाइने र ठूला–ठूला खाडल बनाएर उत्खनन गर्न नपाइने, बस्ती क्षेत्रमा उत्खनन् गर्न नपाइने लगाएतका नियम पालिकाले निर्धारण गरेको छ । नदीजन्य पदार्थ उत्खननको लागि खाँडादेवी गाउँपालिकाले कानूनी प्रक्रिया पुर्याएर टेण्डर प्रक्रियाद्धारा टेण्डर लगाएको छ । यसरी पालिकाले टेण्डर लगाएको भएता पनि टेण्डर लिने व्यक्तिलाई नदीजन्य पदार्थको कच्चा पदार्थ उत्खनन गर्नै नदिई अन्य व्यक्तिले चोरी निकासी गरेपछि पालिकाले अनुगमनमा कडाई गरेको गाउँपालिकाले जनाएको छ ।
रातको समयमा अवैद्य रुपमा चोरी निकासी गर्ने गिरोहलाई हदैसम्मको कारवाही हुने रामेछापका प्रमुख जिल्ला अधिकारी शोभाखर रेग्मीले जानकारी दिए । उनले भने– कानुन विपरित कार्य गर्ने जो सुकै भए पनि तिनीहरुलाई कानुनी दायरामा ल्याएर कारवाही गर्न आफुले प्रहरीलाई निर्देशन दिएको छु ।
