रामेछाप — मन्थली नगरपालिका वडा नम्बर ११, नाटीला बुधबार ‘बालमैत्री स्थानीय शासन वडा’ घोषणा गरिएको छ। एक औपचारिक कार्यक्रमका बीच सम्पन्न घोषणा समारोहमा प्रमुख अतिथि संविधानसभा सदस्य तथा पूर्व गृह राज्यमन्त्री श्याम कुमार श्रेष्ठले बालमैत्री अवधारणालाई व्यवहारमा लागू गर्न स्थानीय तह जिम्मेवार बन्नुपर्नेमा जोड दिनुभयो।
श्रेष्ठले भन्नुभयो, “बालमैत्री घोषणा एउटा सुखद सुरुआत हो, तर यसको प्रभाव देखिन कार्यान्वयनमा चासो दिनुपर्छ। योजना बनाउने मात्र होइन, व्यवहारमै देखिने गरी काम गर्नुपर्छ।” उहाँले पछिल्लो समय देशमा देखिएको राजावादी प्रवृत्तिको आलोचना गर्दै, “राजावादीहरूको अवस्था देख्दा दया लाग्छ, इतिहास उल्टाउने प्रयासको कुनै अर्थ छैन,” भन्नुभयो।
कार्यक्रमको अध्यक्षता वडा अध्यक्ष भिम बहादुर थापा मगरले गर्नुभएको थियो। विशेष अतिथि युवराज श्रेष्ठ रहेका थिए भने अन्य अतिथिहरुमा वडा सदस्यहरू, विभिन्न राजनीतिक दलका प्रतिनिधिहरू, सामुदायिक संघ-संस्था तथा विद्यालयका शिक्षक र विद्यार्थीहरू सहभागी थिए।
कार्यक्रममा सहभागीहरूले बालमैत्री वडा घोषणा भएकोमा खुसी व्यक्त गर्दै अब वडाले बालबालिकामैत्री सेवा, सुविधा र सुरक्षामा थप ध्यान दिने विश्वास व्यक्त गरेका छन्। अभिभावक, शिक्षक, वडाका अगुवा तथा संघ-संस्थाका प्रतिनिधिहरुले यस्तो घोषणाले स्थानीय शासनमा बालबालिकाको आवाज सुन्ने संस्कारको थालनी गर्ने बताएका थिए।
घोषणा कार्यक्रम सांस्कृतिक र सामुदायिक रङमा रंगिएको थियो। प्रमुख अतिथिलाई परम्परागत पञ्चे बाजा सहित स्वागत गरिएको थियो भने स्थानीय विद्यालयका बालबालिकाले आकर्षक सांस्कृतिक प्रस्तुति – विशेषतः नृत्य प्रदर्शन – गरेका थिए। कार्यक्रममा वडामा सक्रिय विभिन्न संघ-संस्थाका प्रतिनिधिहरू, सेवा प्रवाहमा संलग्न कर्मचारी, शिक्षकलगायतलाई प्रशंसा पत्रद्वारा सम्मान गरियो।
कार्यक्रममा बोल्ने वक्ताहरुले बालमैत्री अवधारणालाई व्यवहारमा उतार्न अभिभावक, शिक्षक, जनप्रतिनिधि र स्वयं बालबालिका सबैको भूमिका अपरिहार्य रहेकोमा जोड दिएका थिए। कार्यक्रम अन्त्यतिर बोल्दै वडा अध्यक्ष थापा मगरले वडा कार्यालयले बालमैत्री कार्ययोजनाको खाका तयार गरिसकेको जानकारी दिनुभयो। “अब हाम्रा सबै सेवा बालबालिकाको अधिकार र हितअनुकूल बनाउन व्यवस्थित पहल गर्नेछौं,” उहाँले प्रतिवद्धता जनाउनुभयो।
