फागुन २१ गते सम्पन्न प्रतिनिधिसभा सदस्य निर्वाचनमा म्याग्दी जिल्लाबाट स्वतन्त्र उम्मेदवार महावीर पुन भारी मतान्तरसहित विजयी भएका छन्। एक मात्र निर्वाचन क्षेत्र रहेको म्याग्दीमा पुनले नेकपा एमालेका उम्मेदवार हरिकृष्ण श्रेष्ठ भन्दा करिब तीन गुणा बढी मत ल्याउँदै जित हासिल गरेका हुन्।
प्राप्त विवरण अनुसार पुनले २२ हजार ८५० मत पाएका छन् भने उनका निकटतम प्रतिस्पर्धी श्रेष्ठले ७ हजार ९१९ मत प्राप्त गरेका छन्। त्यस्तै, नेपाली कांग्रेसका कर्णबहादुर भण्डारी ले ६ हजार ६७६ मत पाएका छन्।
यसैगरी, नेपाली कम्युनिस्ट पार्टीका अर्जुन थापा ले ३ हजार ५२९ मत प्राप्त गरेका छन्। यद्यपि, मुख्य निर्वाचन अधिकृतको कार्यालयले निर्वाचन परिणामको औपचारिक घोषणा भने अझै गर्न बाँकी रहेको बताइएको छ।
म्याग्दीमा कुल ८६ हजार ३९७ मतदाता रहेका मध्ये ४६ हजार २१५ मत खसेको थियो।
