बागमती प्रदेशका मुख्यमन्त्री इन्द्रबहादुर बानियाँले जेन–जी आन्दोलनका क्रममा भएको जनधन र संरचनागत क्षतिप्रति गहिरो दुःख व्यक्त गरेका छन्। भदौ २३ र २४ गतेको प्रदर्शनमा हेटौँडास्थित बागमती प्रदेश सरकारका मन्त्रालय र विभिन्न कार्यालयमा तोडफोड तथा आगजनी भएपछि आज उनले प्रत्यक्ष अवलोकन गरेका हुन्।
निरीक्षणका क्रममा मुख्यमन्त्री बानियाँले नागरिकलाई सेवाप्रवाहमा ढिलाइ नहुने प्रतिबद्धता जनाउँदै भने, “सार्वजनिक सम्पत्तिमा क्षति पुर्याउनु दुःखद् छ, यस्ता घटना नघटेको भए राम्रो हुने थियो। तर, क्षतिग्रस्त संरचना छिट्टै मर्मत गरेर सेवा निरन्तरता दिनेछौँ।”
उनले बागमती प्रदेशसभा सचिवालय, सामाजिक विकास मन्त्रालय, स्वास्थ्य मन्त्रालय, सहकारी तथा गरिबी निवारण मन्त्रालय, मदन भण्डारी स्वास्थ्य विज्ञान प्रतिष्ठान, भौतिक पूर्वाधार मन्त्रालयलगायत क्षतिग्रस्त भवनहरूको अवलोकन गरेका थिए।
जेन–जी प्रदर्शनकारीले प्रदेशसभा सचिवालय भवनसहित नौ मन्त्रालय र तिनअन्तर्गतका कार्यालयमा तोडफोड र आगजनी गरेका थिए। मुख्यमन्त्री बानियाँले सरसफाइ तथा पुनःस्थापनाका काम तिव्र गतिमा अघि बढाइने बताउँदै जनसेवामा कुनै अवरोध नहुने स्पष्ट पारे।
