रामेछाप । आगामी बैशाख ३० गते सरकारले स्थानिय तहको निर्वाचनको मिति घोषणा गरेसँगै रामेछापका राजनितिक दलका नेता मतदाता रिजाउन विभिन्न कार्यक्रम लिएर गाउँ दौडाहामा ब्यस्त रहेका छन् ।
स्थानिय तहको निर्वाचनको मिति नजिकिदै जाँदा प्रमुख दल नेपाली काँग्रेस, नेकपा एमाले, नेकपा (एस), नेकपा माओवादी केन्द्र र राप्रपा नेपाल यतिखेर चुनावी कार्यक्रम लिएर गाउँगाउँ पसेका हुन् । जिल्लाको २ नगरपालिका र ६ वटा गाउँपालिका गरी ८ वटा स्थानिय तह रहेको रामेछापमा सबै दलका नेताहरु चुनावी कार्यक्रम सहित गाउँ केन्द्रित भएका हुन् ।
यतिखेर गाउँगाउँमा दैनिकजसो पार्टीका विभिन्न कार्यक्रमहरु भइरहेका छन् । गाउँगाउँमा अहिले वडा भेला, कार्यकर्ता भेटघाट, प्रशिक्षण, पार्टी प्रवेश लगाएतका कार्यक्रमहरु भइरहेका छन् । यतिखेर सवै पार्टीका नेताहरु मतदातालाई कसरी आफ्नो पक्षमा पार्ने भन्ने दौडधुमा रहेका छन् । अहिले पार्टीको निर्णय अनुसार नेपाली काँग्रेस रामेछापले “घरघर जाऔं नेपाली काँग्रेसलाई जिताऔं” भन्ने मुल नारा लिएर गाउँ पसेको छ । काँग्रेसले दैनिक जसो पालिकाका सबै वडा तह र वस्तीवस्तीसम्म पुगेर भेटघाट गर्ने कार्यक्रम गर्दै आएको छ । त्यस्तै पार्टीले पालिकाको वडा तहदेखी जिल्ला तहसम्मका पदाधिकारीलाई प्रशिक्षण कार्यक्रम गरेर गाउँगाउँमा खटाइएको नेपाली काँग्रेस रामेछापका प्रवक्ता नारायण बोगटीले जानकारी दिए ।
त्यसैगरी नेकपा एमालले पनि गाउँगाउँमा पुगेर कार्यकर्ताहरुसँग भेटघाट र अन्र्तक्रिया कार्यक्रमहरु गर्दै आएको छ । पार्टीले वडा तह देखी पालिका हुँदै जिल्ला तहसम्म स्थानिय तहको निर्वाचन लक्षित कार्यक्रमहरु संचालन गर्दै आएको नेकपा एमाले रामेछापका जिल्ला अध्यक्ष आनन्दकुमार श्रेष्ठले जानकारी दिए ।
त्यस्तै नेकपा माओवादी केन्द्र रामेछापले पनि स्थानिय तहको निर्वाचन नजिकिदै जाँदा निर्वाचन लक्षित कार्यक्रमहरु संचालन गर्दै आएको छ । यतिखेर माओवादी केन्द्र रामेछापले टोलटोलमा कार्यकर्ता भेटघाट र प्रशिक्षण कार्यक्रममा व्यस्त रहेको नेकपा माओवादी केन्द्रका जिल्ला अध्यक्ष मयनकुमार मोक्तानले जानकारी दिए ।
त्यसैगरी नेकपा (एस) ले पनि गाउँगाउँमा संगठन विस्तार गर्दै आएको छ । उक्त पार्टीले स्थानिय तहको चुनाव लक्षित कार्यक्रम समेत संचालन गर्दै आएको छ । गाउँगाउँमा पार्टी प्रवेश कार्यक्रम सँगै कार्यकर्ता भेला गर्दै आएको नेकपा (एस) रामेछापका अध्यक्ष रमेशकुमार वस्नेतले जानकारी दिए ।
स्थानिय तहको उम्मेदवारमा आकांक्षी पुरानै
स्थानिय तहको निर्वाचनको मिति नजिकीदै जाँदा रामेछापका केही स्थानिय तहका जनप्रतिनिधिहरु दोहोरिने आकांक्षा राखेका छन् ।
रामेछापमा ८ वटा स्थानिय तह मध्ये मन्थली नगरपालिका, उमाकुण्ड गाउँपालिका, गोकुलगंगा गाउँपालिका, लिखुतामाकोशी गाउँपालिका र खाँडादेवी गाउँपालिका गरी ५ वटा पालिकामा नेकपा एमालले जित हासिल गरेको थियो । जसमध्ये अहिले उमाकुण्ड गाउँपालिकाका प्रमुख शेरवहादुर सुनुवार, गोकुलगंगा गाउँपालिका प्रमुख खड्ग बहादुर सुुनुवार र खाँडादेवीका प्रमुख प्रेम वहादुर तामाङले यसवर्ष पनि स्थानिय तहको निर्वाचनमा दोहोरिने आकांक्षा राखेका छन् ।
यसवाहेक मन्थली नगरपालिकाका प्रमुख रमेश कुमार बस्नेत नेकपा (एस) पार्टीमा प्रवेश गरेका छन् । उनले पनि नेकपा (एस) वाट आफ्नो उम्मेदवारी दिने घोषणा गरेका छन् । उता लिखु तामाकोशी गाउँपालिका प्रमुख गोबिन्द वहादुर खड्का भने अहिलेसम्म उम्मेदवारी दिने वा नदिने यस बिषयमा कुनै आधिकारीक धारणा घोषणा गरेका छैनन् ।
नेपाली काँग्रेसवाट निर्वाचित रामेछाप नगरपालिकाको प्रमुख नरबहादुर थापामगर पनि दोहोरिने मनस्थितीमा छैनन् । यसवाहेक नेकपा माओवादी केन्द्रवाट निर्वाचित सुनापति गाउँपालिकाका प्रमुख धावा लामा दोहोरिने मनस्थितीमा छैनन भने दोरम्वा शैलुङ्ग गाउँपालिकाका प्रमुख कमानसिंह तामाङ्ग पनि दोहोरिने मनस्थितीमा रहेका छन् ।
उनीहरु वाहेक दुई नगरपालिका उप–प्रमुख र ६ वटै पालिका उपाध्यक्षले भने अहिलेसम्म दोहोरिने वा छाड्ने यस बिषयमा केही धारणा सार्वजनिक गरेका छैनन् । यसवाहेक रामेछापका अधिकासं स्थानिय तहका वडा अध्यक्षहरु पनि पुनः दोहोरिने आकांक्षीको लिस्टमा रहेकाे जनाएका छन् ।
