रामेछाप । रामेछाप नगरपालिका–८ बालमन्दिरमा रहेको मतदान केन्द्रमा मतदान गरेर घर फर्कदै गरेका दुई युवा बिच बाटोमा नै कुटिएका छन् ।
मतदान गरेर घर फर्कदै गरेका ती दुई युवालाई रामेछाप नगरपालिका–८ डुम्रिखर्क भन्ने स्थानमा सडकमा नै बसिरहेका केही युवाले मोटरसाइकल रोकी कुटपिट गरेका हुन् । कुटपिटमा परि रामेछाप नगरपालिका–८ का २१ बर्षिय गोविन्द सुवेदी र वर्ष ४१ का देविलाल सुवेदी घाइते भएका छन् ।
उनीहरु दुवैको घटनास्थलवाट उद्धार गरि हाल जिल्ला अस्पताल रामेछापमा उपचार भइरहेको र दुवै जनाको टाउँको र खुट्टामा गम्भिर चोट लागेको छ । दुवैको अवस्था गम्भिर भएकाले थप उपचारको लागि काठमाण्डौं पठाउने तयारी भइरहेको रामेछाप नगरपालिका–८ का निर्वतमान वडा अध्यक्ष केदार कार्कीले जानकारी दिए ।
कुटपिटमा संलग्न मध्ये १ जनालाई प्रहरीले प्रक्राउ गरेको र बाँकी अन्य तीन जना भने फरार रहेका छन् । उनीहरुको खोजी कार्य भइरहेको र घटना के कारणले भएको हो भन्ने बिषयमा थप अनुसन्धान भइरहेको पनि जिल्ला प्रहरी कार्यालय रामेछापका प्रहरी नायव उपरीक्षक राजकुमार थिङ्गले जानकारी दिए ।
