रामेछाप । मंसिर ४ गते सम्पन्न हुन लागेको प्रतिनिधिसभा सदस्य एवं प्रदेशसभा सदस्य निर्वाचनको लागि मतदान गराउन खटिएका मतदान अधिकृत र अन्य कर्मचारीहरु आवश्यक सामाग्री लिएर गाउँ प्रस्थान गरेका छन् ।
मुख्य निर्वाचन कार्यालय रामेछापले निर्वाचन सम्पन्न गराउनको लागि रामेछापका १ हजार ८ सय १७ जना कर्मचारीहरु खटाएको छ । मतदान स्थल र मतदान केन्द्रमा खटिएका कर्मचारीहरुले जिल्ला निर्वाचन कार्यालयवाट आवश्यक निर्वाचन सामाग्री बुझेर बिहिवार साँझसम्म मतदान स्थलमा पुग्ने गरि गाउँ तर्फ लागेका हुन् ।
मतदान गराउन खटिएका सवै कर्मचारीहरुलाई कार्यालयले ६० प्रकारका निर्वाचन सामाग्रीहरु प्रदान गरिएको र ती सवै सामाग्री लिएर मतदान अधिकृत र कर्मचारीहरु आजसाँझसम्म आ–आफ्नो मतदानस्थल पुगेर सूचना सार्वजनिक गर्नुपर्ने जिल्ला निर्वाचन कार्यालय रामेछापका निर्वाचन अधिकृत मधुकर कुमार शाहले जानकारी दिए ।
उनले भने– निर्वाचन सामाग्री गाउँगाउँसम्म पुरयाउनका लागि केही सरकारी सवारीसाधन र केही भाडामा सवारीसाधन लिएर मतदानका सामाग्रीहरु पठाएका छौं । केही नजिकका मतदान स्थलको सामाग्रीहरु भने आज दिनभर वितरण गरिने पनि अधिकारी शाहले बताए ।
रामेछापमा एउटा प्रतिनिधिसभा र दुईवटा प्रदेशसभा रहेको छ । जसमा १ लाख ८० हजार १ सय ६ जना मतदाताले निर्वाचनमा मतदान गर्नेछन् । जिल्लामा ९६ वटा मतदान स्थल र २२६ वटा मतदान केन्द्र निर्धारण गरिएको छ । ती मतदान केन्द्रको सुरक्षाको लागि करिव २५ सयको संख्यामा म्यादी प्रहरी, नेपाल प्रहरी, शसस्त्र प्रहरी र नेपाली सेना परिचालन गरिएको मुख्य निर्वाचन कार्यालय रामेछापले जनाएको छ ।
