काठमाडौं । प्रधानमन्त्री सुशीला कार्कीले मन्त्रिपरिषद् विस्तारका क्रममा पूर्वन्यायाधीशदेखि स्वास्थ्य विज्ञ र सञ्चारकर्मीलाई मन्त्रीमा सिफारिस गरेकी छिन्। प्रधानमन्त्री कार्यालयका अनुसार सर्वोच्च अदालतका पूर्वन्यायाधीश अनिलकुमार सिन्हालाई भूमि व्यवस्था, सहकारी तथा गरिबी निवारण मन्त्रालय र उद्योग, वाणिज्य तथा आपूर्ति मन्त्रालयको जिम्मेवारी दिने गरी राष्ट्रपति समक्ष नाम पठाइएको छ।
त्यसैगरी, अतिरिक्त स्वास्थ्य सचिव रहेकी डा. संगीता कौशल मिश्रालाई स्वास्थ्य मन्त्रालयको नेतृत्व दिन सिफारिस गरिएको छ। मन्त्री बन्ने सम्भावना देखिएसँगै डा. मिश्राले आइतबार नै आफ्नो पदबाट राजीनामा दिएकी थिइन्। सञ्चार मन्त्रालयका लागि भने प्रधानमन्त्री कार्कीले सञ्चारकर्मी जगदीश खरेलको नाम राष्ट्रपति कार्यालयमा सिफारिस गरेकी छिन्। स्रोतका अनुसार, राष्ट्रपति कार्यालयबाट स्वीकृति र शपथपछि उनीहरूले मन्त्रालयको जिम्मेवारी औपचारिक रूपमा सम्हाल्नेछन्।
