काठमाडौँ । प्रधानमन्त्री तथा एमाले अध्यक्ष केपी शर्मा ओली र नेपाली कांग्रेसका सभापति शेरबहादुर देउवाबीच मन्त्री हेरफेरबारे आइतबार बालुवाटारमा छलफल भएको छ। बैठकमा उपप्रधानमन्त्री एवं अर्थमन्त्री विष्णुप्रसाद पौडेल र गृहमन्त्री रमेश लेखक पनि सहभागी थिए।
बैठकमा प्रधानमन्त्री ओलीले कार्यसम्पादन कमजोर र विवादित मन्त्रीहरूलाई हटाएर नयाँ मन्त्री ल्याउने प्रस्ताव राखे। उनले सरकार गठन भएको एक वर्ष पुगेकाले “पुरानालाई बिदा गरेर नयाँ ल्याउनुपर्ने” धारणा राखे।
तर देउवाले पार्टीभित्रको समीकरण मिलाउन गाह्रो हुने भन्दै तत्काल कांग्रेस कोटाबाट मन्त्री नफेर्न आग्रह गरे। “बल्ल मिलाएको समीकरण फेरि बिगार्न हुँदैन,” देउवाको भनाइ उद्धृत गर्दै एक नेताले बताए।
एमालेले यसअघि दुई मन्त्री फेरेको छ भने कांग्रेसले अहिलेसम्म कुनै हेरफेर गरेको छैन। बैठकमा भूमि विधेयक, संवैधानिक परिषद्सम्बन्धी विधेयक र संघीय निजामती कर्मचारी विधेयकबारे पनि छलफल भए पनि निष्कर्ष भने निस्किएन।
