रामेछाप – बागमती प्रदेशका सामाजिक विकास मन्त्री कञ्चन चन्द्र बादेले नेपाली काँग्रेस रामेछापका नेता तथा कार्यकर्तासँग मन्थलीमा विशेष भेटघाट गरेका छन्। नेपाली काँग्रेस मन्थली नगर समितिको आयोजनामा भएको उक्त कार्यक्रममा स्थानीय स्तरका नेता, जनप्रतिनिधि तथा पार्टी कार्यकर्ताको उल्लेख्य उपस्थिति थियो।
कार्यक्रमलाई सम्बोधन गर्दै मन्त्री बादेले काँग्रेस नेता तथा कार्यकर्ताले “सिर ठाडो पारेर हिँड्ने गरी काम गर्नुपर्ने” आवश्यकता औंल्याए। उनले पार्टी संगठनलाई सुदृढ बनाउनै काँग्रेसको मुख्य जिम्मेवारी रहेको उल्लेख गर्दै कुनै पनि जिल्ला वा पालिकामा विभेद गर्ने गरी काम नगर्ने स्पष्ट प्रतिवद्धता जनाए। मन्त्री बादेका अनुसार विकास र समृद्धिको यात्रामा सबै क्षेत्रलाई समान महत्व दिनुपर्ने हुन्छ र त्यसैअनुसार आफूले जिम्मेवारी निर्वाह गर्ने बताए।
कार्यक्रममा उपस्थित रामेछापका काँग्रेस नेता तथा कार्यकर्ताले बागमती प्रदेश सरकारले प्रस्तुत गरेको चालु आर्थिक वर्षको बजेटप्रति असन्तुष्टि प्रकट गरे। उनीहरूले रामेछापलाई बजेटीय विनियोजनमा उपेक्षा गरिएको भन्दै आपत्ति जनाउँदै जिल्लाको विकासका लागि ठोस कार्यक्रम ल्याउन सरकारसँग आग्रह गरे। उनका अनुसार रामेछाप भौगोलिक, सामाजिक र आर्थिक दृष्टिले महत्वपूर्ण सम्भावना बोकेको जिल्ला भए पनि योजनागत प्राथमिकतामा पछि पर्नु अन्यायपूर्ण भएको छ।
सोही अवसरमा कार्यकर्ताहरूले शिक्षा, स्वास्थ्य, सडक, खानेपानी र रोजगारका क्षेत्रमा प्रदेश सरकारले थप ध्यान दिनुपर्ने सुझाव दिएका थिए। उनीहरूले मन्त्रीलाई जिल्लामा देखिएका समस्या र चुनौतीहरूबारे अवगत गराउँदै आगामी दिनमा रामेछापलाई प्राथमिकता दिने अपेक्षा राखे।
