मेरो प्रदेश डेक्समन्थली, भाद्र १४
रामेछापको सदरमुकाम मन्थलीमा शुक्रबारदेखि दुईदिने निःशुल्क मोतियाबिन्दु शल्यक्रिया शिविर सुरु भएको छ । मोतियाबिन्दुबाट आँखाको ज्योति आंशिक वा पुर्ण रुपमा गुमेका बिरामीलाई दृष्टि फर्काउन सहयोग गर्ने हेतुले सामुदायिक विकास समाजको आयोजनामा जिल्ला सामुदायिक आँखा केन्द्रमा शिविर सुरु भएको हो । नेपाल आँखा कार्यक्रम, तिलगङ्गा आँखा प्रतिष्ठान, सामुदायिक सर्किजल आँखा केन्द्र रामेछापको ‘केयर ब्लाइन्डनेस प्रोजेक्ट’ तथा पीएसएफ लक्जेम्बर्ग र खाँडादेवी गाउँपालिकाको सहयोगमा शिविर सुरु भएको सामुदायिक विकास समाजले जनाएको छ । 
समाजका निर्देशक मिलन कुमार घिसिङले केही दिन अघि खाँडादेवी गाउँपालिकामा सम्पन्न आँखा शिविरबाट पहिचान भएका बिरामीसहित अन्य पालिकाका मोतियाबिन्दुका बिरामीलाई समेत शल्यक्रिया सेवा दिन शिविर आयोजना गरिएको बताए । उनका अनुसार पहिलो दिन ६९ जना बिरामीको शल्यक्रिया गरिएको थियो भने शिविर अवधिभर १ सय ५० जनाको शल्यक्रिया हुने छ ।  मोतियाबिन्दुले आँखाको समस्या भोगिरहेका तर आर्थिक अभावमा उपचारबाट वञ्चित बिरामीलाई शिविरमा उपचार शल्यक्रिया सहित खानबस्न र यातायातको व्यवस्था पनि गरिएको उनले बताए । आर्थिक अभाव र भौगोलिक कठिनाइका कारण शल्यक्रियाबाट वञ्चित भएका मोतियाबिन्दुका बिरामीको आँखाको ज्योति फर्काउन शिविर महत्वपूर्ण रहेको समाजले जनाएको छ ।