मेरो प्रदेश डेक्स
मन्थली, भाद्र १६
रामेछापको सदरमुकाम स्थित मन्थली माविमा आइतबार पहिलो पटक अर्थशास्त्र सम्बन्धी शैक्षिक सामग्री प्रदर्शनी कार्यक्रम सम्पन्न भएको छ । अर्थशास्त्र विषयप्रति विद्यार्थीको बुझाइलाई बृहत् एवं व्यवहारिक बनाउन विद्यालयले आयोजना गरेको सो कार्यक्रम सम्पन्न भएको हो । 
विद्यालयका अनुसार  प्रदर्शनीमा ९ देखि १२ कक्षा सम्मका १ सय ४२ जना विद्यार्थी सहभागी भएका थिए, भने २३ वटा स्टल रहेको थियो ।  स्टलमा अर्थशास्त्र सम्बन्धी विभिन्न आकर्षक मोडेलहरू प्रदर्शन गरिएको विद्यालयका प्रधानाध्यापक डा. टंकप्रसाद दाहालले जानकारी दिए । प्रदर्शनीमा उत्कृष्ट हुने विद्यार्थीहरूलाई पुरस्कृत गरिएको थियो । त्यसैगरी विद्यालयका अर्थशास्त्र विषयका शिक्षक अभिषेक पौडेलले प्रदर्शनीमा सहभागी केही विद्यार्थीहरुलाई व्यक्तिगत तर्फबाट नगद पुरस्कार पनि वितरण गरेका थिए । यसले विद्यार्थीहरुको सिर्जनशीलतालाई प्रोत्साहन मिलेको छ ।
विद्यार्थीहरूमा  अर्थशास्त्र सम्बन्धी सैद्धान्तिक तथा व्यावहारिक बुझाइ विकास गर्न कार्यक्रम आयोजना गरिएको प्रधानाध्यापक डा. दाहालले जानकारी दिए । कार्यक्रमबाट अर्थशास्त्र विषयलाई केवल किताबमा मात्र सीमित नराखी व्यवहारिक र जीवनोपयोगी बनाउन प्रेरणा समेत मिलेको उनले बताए ।