रामेछाप । जिल्लाको सदरमुकाम मन्थलीमा निर्माणाधीन चिस्यान केन्द्र अलपत्र अवस्थामा छाडिएको छ । मन्थली नगरपालिका–१ सानीमदौमा निर्माण भएको पाँच सय मेट्रिक टन क्षमताको चिस्यान केन्द्र निर्माण सम्पन्न भएता पनि अलपत्र अवस्थामा छाडिएको छ । निर्माण व्यवसायीले निर्माणको काम सम्पन्न भएको बताए पनि सञ्चालनमा ल्याउन सकेको छैन । वाग्मती प्रदेश सरकारको ७० र मन्थली नगरपालिकाको ३० प्रतिशत लागत साझेदारीमा बनेको चिस्यान केन्द्र बागमती प्रदेश सरकारले नगरपालिकालाई हस्तान्तरण गर्न नसक्दा अलपत्र परेको हो ।
ठुलो लगानीमा चिस्यान केन्द्र बनेर पनि प्रयोगमा आउन नसक्दा जिल्लाको विभिन्न स्थानमा उत्पादन हुने जुनार लगायतका अमिलो जातका फलफूल, किवी, आलु, विभिन्न जातका तरकारी उत्पादन गर्ने किसानहरू समस्यामा रहको स्थानीयको भनाइ छ ।
वाग्मती प्रदेश सरकारको पाँच करोड र मन्थली नगरपालिकाको दुई करोड दश लाख रुपैयाँको साझेदारीमा इजि इन्फा प्रालि काठमाडौँले निर्माण गरेको हो । चिस्यान केन्द्रको ५० केजीका दश हजार बोरा फलफूल तथा तरकारी जन्य उपजहरू चिस्यान गर्न सक्ने क्षमता छ । निर्माण सम्पन्न भएर सफल परीक्षण समेत भइसकेको चिस्यान केन्द्र बागमती प्रदेश सरकारले हस्तान्तरण नगर्दा प्रयोगमा ल्याउन नसकेको मन्थली नगरपालिकाका प्रमुख प्रशासकीय अधिकृत हरिप्रसाद चापागाईँले बताए । उनले भने –परीक्षण समेत भइसकेको चिस्यान केन्द्रमा व्यवस्थित घेरा बार, रेखदेख र व्यवस्थापन गर्ने कर्मचारी, बस्ने घर, शौचालय तत्कालै आवश्यक रहेको छ । हाल चिस्यान केन्द्र मात्र निर्माण भएको छ । प्रदेश सरकारले हस्तान्तरण नगर्दा हामीले निर्माण गर्न समेत सकेका छैनौँ ।हामीलाई जिम्मा दिए हामी तत्काल सञ्चालन गर्न तयार छौँ । चिस्यान केन्द्र सञ्चालनको प्रक्रिया अगाडी बढाउन पहिला प्रदेशले सरकारले हामीलाई आधिकारिक रूपमा हस्तान्तरण गर्नु पर्ने हो, तर पटक पटक आग्रह गर्दा पनि प्रदेश सरकारले चिस्यान केन्द्र हस्तान्तरण र सञ्चालनको विषयमा चासो देखाएन’,
मन्थली नगरपालिकाको ३० प्रतिशत आफ्नो पनि प्रदेश सरकारको कृषि मन्त्रालयलाई उपलब्ध गराएपछि चिस्यान केन्द्र निर्माणका लागि टेन्डर आह्वानदेखि निर्माण सम्म वाग्मती प्रदेश सरकारले नै गरेको थियो । यस बाहेक मन्थली नगरपालिकाले आफ्नो लगानीमा चिस्यान केन्द्रसम्म आवश्यक विद्युत् पु¥याइ टिओडी मिटर जडान गरेको छ ।
