रामेछाप । सरकारले अग्रभागमा रहेर काम गर्ने स्वास्थ्य कर्मीलाई दिने भनेको जोखिम भत्ता रकम मन्थली नगरपालिकामा कार्यरत १ सय ३४ जना स्वास्थ्यकर्मीहरुले अहिलेसम्म पाउन सकेका छैनन् ।
कोरोना महामारी बढेसँगै पहिलो चरणमा नै स्वास्थ्यकर्मीहरुलाई ५० प्रतिशतसम्म जोखिम भत्ता दिने गरि सरकारले वजेटको व्यवस्थापन गरेर स्थानिय तहमा पठाउँदा पनि उक्त रकम स्वास्थ्यकर्मीहरुले पाउन सकेका छैनन् । स्वास्थ्यकर्मीहरुले पहिलो चरणकै रकम पाउन नसकेको अवस्थामा कोरोनाको तेस्रो लहरमा काम गर्ने की नगर्ने भन्ने बिषयमा कर्मचारीहरु बिच छलफल भइरहेको प्राथमिक स्वास्थ्य केन्द्रका प्रमुख डा.नवराज श्रेष्ठले जानकारी दिए ।
उनले भने– कोरोनाका बिरामी वढेसँगै हामीहरुले आइसोलेसनमा विरामी भर्ना गरेर काम गर्दै आएका छौं । नगरपालिकाले कोरोनाको पहिलो चरणमा केही स्वास्थ्यकर्मीलाई आशिंक रकम मात्रै दियो । कर्मचारीले सरकारले भने अनुसारको रकम अझै पाउन सकेका छैनन् । हामीले पाउने जोखिम भत्ताको बिषयमा पटक–पटक नगरपालिकासँग रकम माग गर्यौ तर अझै पाउन सकेका छैनौं । अब फेरी कोरोनाको तेस्रो लहरको सामना गर्दै छौं । सरकारले कर्मचारीलाई दिएको सुविधा वापतको रकम नपाएपछि कर्मचारीले काममा चासो नदेखाएको डा.श्रेष्ठले बताए ।
मन्थली नगरपालिकाका १४ वटा वडाका स्वास्थ्य संस्थामा कार्यरत १ सय ३४ जना स्वास्थ्यकर्मीहरु रहेका छन् । ती मध्ये केही स्वास्थ्यकर्मीलाई पहिलो चरणको कोरोनाको समयमा केही रकम प्रदान गर्यौ र बाँकी अन्यलाई रकम उपलव्ध गराउन नसकिएको मन्थली नगरपालिकाका स्वास्थ्य शाखाका प्रमुख केशव फुयालले जानकारी दिए ।
उनले भने– पहिलो चरणमा केही स्वास्थ्यकर्मीले केही रकम पाए । कोरोनाको दोश्रो चरणको रकम अझै दिन सकिएको छैन् । पुनः कोरोनाको तेस्रो चरणमा पनि स्वास्थ्यकर्मीहरुले अग्रभागमा रहेर काम गर्नुपर्ने भएकाले कसलाई कसरी जोखिम भत्ता उपलव्ध गराउने भन्ने बिषयमा कार्यालयमा छलफल भएपछि मात्रै रकम उपलव्ध गराउने सोचमा मन्थली नगरपालिका रहेको छ । स्वास्थ्यसंस्थामा कार्यरत १ सय ३४ जना स्वास्थ्यकर्मी भएपनि सबैलाई उक्त रकम दिने मनस्थितीमा मन्थली नगरपालिका नरहेको पनि स्वास्थ्य प्रमुख फुयालले बताए ।
