मेरो प्रदेश डेक्स

मन्थली, भाद्र ११
रामेछापको मन्थली नगरपालिकालाई जिल्लाकै पहिलो बालमैत्री स्थानीय शासनयुक्त नगर घोषणा गरिएको छ । बुधबार तिनलालपार्कमा आयोजित एक समारोहका बिच बागमति प्रदेशका सामाजिक विकास मन्त्री कञ्चन चन्द्र बादेले पालिकालाई बालमैत्री घोषणा गर्नु गरेका हुन् ।
सो अवसरमा उनले बालबालिका राष्ट्रका भविष्य रहेको बताउँदै भविष्यलाई उज्वल बनाउन पालिकाको मिहनेतको प्रशंसा गरे । मन्त्री बादेले पालिकाको बालमैत्री अभियानलाई निरन्तरता दिन सहयोग गर्ने प्रतिबद्धता जनाए । समारोहमा बागमति प्रदेशका सांसद तारानारायण श्रेष्ठले बालबालिको चौतर्फी विकासमा ध्यान दिँदै पालिकाले चालेकोे कदम प्रति खुसी व्यक्त गर्दै आगामी दिनमा घोषणा अनुरुपको काम गर्न आफ्नो तर्फबाट उल्लेख साथसहयोग गर्ने प्रतिबद्धता जनाए ।
समारोहमा नगरप्रमुख लब श्रेष्ठले बालमैत्री नगर घोषणा प्रतिवेदन प्रस्तुत गर्दै १४ वटै वडा सहित पालिकामा सम्पूर्ण सुचक र मापदण्डहरु पुरा भएपछि बालमैत्री घोषणा गरिएको बताए । उनले बालमैत्री स्थानीय शासनको दिगोपनाको लागि पर्याप्त बजेट विनियोजन गरी पञ्चवर्षिय रणनीतिक योजना तयार पारी काम भईरहेको जानकारी दिए ।
सो अवसरमा शैक्षिक उपलब्धि उत्कृष्ट हासिल गर्न सफल विद्यार्थी एवं शैक्षिक संस्थालाई सम्मान गरिएको छ । उनीहरुलाई थप सफलता हासिल गर्न प्रोत्साहन मिलोस् भनेर बालमैत्री घोषणा समारोहको अवसरमा सम्मान गरिएको पालिकाकी उपप्रमुख ईश्वरी बस्नेतले बताइन् ।
उनका अनुसार २०८१ सालको एसईईमा ४ जिपिए हासिल गरेका सोफिना श्रेष्ठ र सिद्धार्थ खड्कालाई पनि प्रतिव्यक्ति ५० हजार रुपैयाँ पुरस्कार र प्रमाणपत्रसहित सम्मान गरिएको छ । यसैगरी एसईईमा निरन्तर उत्कृष्ट नजिता ल्याउन सफल मन्थली माध्यमिक विद्यालयलाई पनि सम्मान गरिएको छ । त्यस्तै कक्षा ८ मा पालिकाकै उत्कृष्ट हुन सफल मन्थली माध्यमिक विद्यालयकी मनसनु लामा, कर्कला देवी इङ्लिश उपेक्षा श्रेष्ठ र जस्मिना कार्कीलाई नगद पुरस्कार र प्रमाणपत्रसहित सम्मान गरिएको छ ।
समारोहमा सबै राजनीतिक दलका प्रमुख तथा प्रतिनिधि, सरकारी तथा गैरसरकारी कार्यालयका प्रमुख तथा प्रतिनिधिहरू, १४ वटा वडाका वडाध्यक्षहरु, कर्मचारीहरु, शिक्षक विद्यार्थी सहित अभिभावकहरुको सहभागिता रहेको थियो । सहभागि सबैले पालिकामा बालमैत्री अभियानलाई दिगो र प्रभावकारी बनाउन प्रतिबद्धता समेत जनाएका थिए ।
जिल्लाको पहिलो बालमैत्री नगर बन्ने प्रतिस्पर्धामा मन्थली नगरपालिका पहिलो भएको हो । रामेछाप नगरपालिका पनि २१ गते बालमैत्री घोषित हुने तयारीमा रहेको छ । अन्य बालिकाले पनि बालमैत्री अभियानहरु सञ्चालन गरिरहेको जिल्ला समन्वय समिति रामेछापले जनाएको छ ।