रामेछाप । मन्थली नगरपालिकाको सहयोगमा जिल्ला सदरमुकाम मन्थलीमा १५ दिने एडभान्स लेडिज फेसन डिजाइन कटिङ तथा सिलाई तालिम सुरु भएको छ । नगरपालिकाको सहयोगमा नेपाल कपडा तथा सिलाई व्यवसायी संघ रामेछापको आयोजनामा जिल्ला भित्र व्यवसायी रूपमा काम गर्दै आएका २० जना महिलाहरूको सहभागिता रहेको छ ।
तालिमको उद्घाटन कार्यक्रमलाई सम्बोधन गर्दै कार्यक्रमका प्रमुख अतिथि समेत रहेका नगरपालिकाकी उप–प्रमुख ईश्वरी बस्नेत तालिम लिन चाहेमा नगरपालिका सधै सबै प्रकारको तालिमलाई सहयोग गर्न तयार रहेको बताउनु भयो । तालिम बाटै मानिसको क्षेमता विकास हुने र आत्मनिर्भर बन्ने भएकाले नगरपालिका तालिम लगाएत सिप विकासमा लगानी गर्न तयार रहेको बताउनु भयो । पछिल्लो समय महिलाहरूका कपडाहरू विभिन्न डिजाइन–डिजाइनका हुने भन्दै ती डिजाइनहरूलाई तयार पार्न सक्षम बन्न सहभागीहरूलाई आग्रह गरिन् । सिप मूलक कार्यक्रमहरू सञ्चालन गरेर महिलाहरू पनि आर्थिक रूपमा सक्षम भएमा घरायसी विभिन्न खाले समस्या समेत समाधान हुने उनको भनाई थियो ।
त्यस्तै मन्थली नगरपालिका–१ का वडा अध्यक्ष रामहरी पौडेलले मन्थली नगरपालिकालाई समृद्धिको बाटोमा अगाडि बढाएको बताए । विभिन्न तालिम दिएर यहाँका जनतालाई सक्षम र आत्मनिर्भरको बाटो तर्फ अगाडि बढाउन आफूहरू लागेको बताउँदै पौडेलले भने ‘अहिले मन्थलीमा टपरी बनाउने, फ्रिज बनाउने, सिलाई कटाइका तालिम भइरहेका छन्’ व्यापार व्यवसायमा सक्रियहरूलाई दक्ष बनाउन केही महिना यता कफी बारिष्ठ, कोट डिजाइनिङ लगायतका तालिम दिई रहेका वडा अध्यक्ष पौडेलले फेरी पनि ‘महिला पञ्चेबाजा, कुकिङ लगायतका तालिम छिट्टै सञ्चालन गर्ने बताउनु भयो ।
