रामेछाप जिल्लाको सदरमुकाम समेत रहेको मन्थली नगरपालिकाका सबै १४ वटै वडा आज एकैसाथ बालमैत्री वडाको रूपमा घोषणा हुँदैछन्।नगरपालिकाका सूचना अधिकारी तथा महाशाखा प्रमुख हेमन्त बुढाथोकीका अनुसार, सबै वडाले बालमैत्री स्थानीय शासन (CFLG) अन्तर्गत निर्धारण गरिएका ५१ वटा सूचकहरू पुरा गरेका छन्। साथै, जिल्ला समन्वय समितिबाट अनुगमन सम्पन्न भइसकेकाले आज बालमैत्री वडा घोषणा गर्ने अन्तिम तयारी पुरा भएको जानकारी दिनुभयो।
बालमैत्री घोषणाका लागि आवश्यक पर्ने शिक्षा, स्वास्थ्य, खानेपानी, बाल संरक्षण र पूर्वाधारलगायतका मुख्य सूचकहरू सबै वडाहरूले पुरा गरिसकेको अधिकारी बुढाथोकीले बताउनुभयो।
१४ वटै वडामा छुट्टाछुट्टै कार्यक्रम आयोजना गरिने र वडास्तरीय घोषणा पश्चात सम्पूर्ण विवरण बागमती प्रदेश सरकारमा प्रतिवेदनको रूपमा पठाइने छ। उक्त प्रतिवेदन प्रदेशबाट अनुमोदन भएपछि मन्थली नगरपालिकालाई बालमैत्री नगरपालिकाको रूपमा घोषणा गर्ने तयारी गरिएको छ।
सूचना अधिकारी बुढाथोकीका अनुसार, असार महिनाभित्र मन्थली नगरपालिकालाई पूर्ण बालमैत्री नगरपालिका घोषणा गर्ने लक्ष्य लिइएको छ।
यसअघि रामेछाप नगरपालिकाका ९ वटै वडा एकैदिन बालमैत्री घोषणा भइसकेका छन्। अब मन्थली नगरपालिकाले पनि सम्पूर्ण वडा स्तरमा यो मान्यता प्राप्त गरेसँगै रामेछाप जिल्ला बालमैत्री स्थानीय शासन कार्यान्वयनमा अग्रपंक्तिमा उभिने अपेक्षा गरिएको छ।
