रामेछाप । कृषकहरुलाई वितरण गरिने कृषि अनुदान बर्षेनी मन्थली नगरपालिकावाट लिदै आएका मन्थली नगरपालिकाका कानुन अधिकृत सुदर्शन रायले यसपटक पनि हात पार्न सफल भएका छन् ।
कानुन अधिकृत रायले नगर प्रमुख र प्रमुख प्रशासकिय अधिकृतलाई आफ्नो प्रभावमा पारेर बर्षेनी कृषकलाई बितरण गरिने अनुदान आफुले लिदै आएका हुन् । उनले चालु आर्थिक वर्ष २०७९÷८० मा पालिकावाट थोपा सिंचाईको लागि ५० प्रतिशत अनुदान रकम आफ्नो फार्म हरियाली सम्बृद्ध कृषक समुहमा पार्न सफल भएका हुन् । उनको फार्म मन्थली नगरपालिका–१ सुकाजोर खोलामा रहेको छ ।
उनले लगातार यस अघि पनि दुई आर्थिक वर्ष अनुदान रकम आफ्नो फार्ममा पार्न सफल भएका थिए । अधिकृत रायले आर्थिक वर्ष २०७७÷०७८ मा घेरा तथा तारवार शिर्षकमा ३ लाख र पोखरी निमार्णको नाममा ३ लाख गरी ६ लाख रुपैयाँ अनुदान रकम बुझेका थिए । त्यसैगरी आर्थिक वर्ष २०७८÷०७९ मा सोही फार्मको नाममा प्लाष्टिक टनेल निमार्णको नाममा ७ लाख ५० हजार र गाई लाई पानी खुवाउने पोखरी निमार्णको लागि ८२ हजार रुपैयाँ अनुदान लिएका थिए ।
सरकारी अनुदान बितरण गर्दा किसान छनौट गर्नुको सट्टा आफ्नै कर्मचारीलाई अनुदान रकम दिदै आएको मन्थली नगरपालिकाका प्रमुख र प्रमुख प्रशासकियको आँखामा आफ्नै कार्यालयका कर्मचारी बाहेक उनीहरुले किसान देखेनन् । सरकारी अनुदान लिन पटक–पटक मन्थली नगरपालिका धाउँदा पनि आफुहरुले कृषि अनुदान पाउन नसकेको मन्थली नगरपालिका–१ का कृषक टेकवहादुर भुजेलले बताए ।
उनले भने– पहिलो कुरा त हामी जस्ता गाउँमा खेती किसान गरेर बस्ने किसानले नगरपालिकाले दिने अनुदानको सूचना नै थाहा पाइदैन । सूचना थाहा पाइहाले पनि अनुदान रकमको लागि छनौटमा नै परिदैन । पालिकाको अनुदान पाउन त कित प्रमुख र हाकीमको नजीकको हुनु परो ! की कर्मचारी नै ? विगत वर्षमा धेरै पटक अनुदानको लागि निवेदन पेश गर्दा पनि पाउन नसकेको गुनासो भुजेलले गरे ।
पालिकाकै कर्मचारीलाई बर्षेनी पटक–पटक एउटै फार्मलाई सरकारी अनुदान दिनु कानुन विपरित भएको मन्थली नगरपालिका–५ का निवर्तमान वडा अध्यक्ष रामवहादुर कार्कीले जानकारी दिए । उनले भने– नियमित एउटै संस्था र त्यसमा पनि आफ्नो कार्यालयको कानुन अधिकृतलाई वर्षेनी अनुदान दिदा अनुदान दिने जनप्रतिनिधि र कर्मचारीलाई पनि लाजलाग्नु पर्ने हो ? सिमित व्यक्ति भएको फार्मलाई कर्मचारीहरु आर्थिक प्रलोभनमा परेर अनुदान दिएको हुनसक्ने कार्कीले आरोप समेत लगाए ।
कृषि अनुदानको लागि पालिकाले निकालेको सूचनाको आधारमा निवेदन परेकाको हकमा नगर समितिले निर्णय गर्दा पालिकाको कर्मचारी पनि परेको हुनसक्ने मन्थली नगरपालिकाका प्रमुख प्रशासकिय अधिकृत हरी प्रसाद चापागाईले जानकारी दिए । उनले भने– पालिकावाट आफ्नै कार्यालयको कर्मचारीलाई बर्षेनी अनुदान दिनु भनेको गलत हो । यस बिषयमा थप आफुले बुझ्ने चापागाईले बताए ।
पालिकावाट कृषि अनुदान लिएपछि कानुन अधिकृत रायले गएको आर्थिक वर्षको अन्तिममा मन्थली नगरपालिकाका तत्कालीन प्रमुख प्रशासकिय अधिकृत लिलाराज पौडेल, लेखा अधिकृत र अन्य कर्मचारीहरुलाई आफ्नै फार्ममा लगेर दारु पानी सहितको रात्री भोज दिएका थिए । रात्रीभोजमा रमेका मध्ये अधिकृत पौडेलको सरुवा भएर जिल्ला छाडेको भए पनि अन्य कर्मचारीहरु पालिकामा नै कार्यरत रहेका छन् ।
