मन्थली । मन्थली नगर खेलकुद विकास समितिको आयोजनामा फागुन ३ गतेदेखि सुरु भएको प्रथम महिला नगर भलिबलको उपाधि मन्थली नगरपालिका वडा नं ७ भटौलीले जितेको छ । बुधवार भएको फाइनल खेलमा वडा नं १३ फुलासीलाई पराजित गराउँदै भटौलीले प्रथम महिला भलिबलको उपाधि जितेको हो ।
विजेता भटौलीले नगद ५० हजारसहित ट्रफि, मेडल र प्रमाण पत्र पाएको छ । उपविजेता फुलासीले नगद ३० हजार, तेस्रो हुन सफल वडा ६ भलुवाजोरले नगद २० हजार रुपैयाँ सहित ट्रफि, मेडल र प्रमाणपत्र प्राप्त गरेका छन् ।
फागुन ३ गते शनिबारेदेखि जिल्ला समन्वय समितिको मैदानमा भएको प्रतियोगितामा महिला तर्फ १४ वडा मध्ये ८ वडा सहभागी भएका थिए । पहिलो पटक महिलाको पनि खेल समावेश गरिएको प्रतियोगितामा नगरका वडा नं १,२, ३, ६, ७, ८ र १३ नम्बर वडाले मात्रै सहभागिता जनाएका थिए । तेस्रो मन्थली नगर कप रनिङ शिल्ड भलिबल प्रतियोगितामा भने १४ वटै वडाले सहभागिता जनाएका थिए ।