प्रतिनिधिसभा निर्वाचनका कारण स्थगित भएको मन्थली नगर कप पुरुष तथा महिला भलिबल प्रतियोगिता वैशाख ४ गते देखि सञ्चालन हुने भएको छ । मन्थली नगर खेलकुद विकास समितिका अनुसार मन्थली माविको खेल मैदानमा हुने यस प्रतियोगिताको तयारीलाई तीव्र पारिएको छ । विगतमा तीन दिनसम्म चल्ने प्रतियोगिता यस वर्ष चार दिनसम्म सञ्चालन गरिने नगर खेलकुद विकास समितिका अध्यक्ष गोपाल माझीले बताउनु भयो.
प्रतियोगिताको पुरुषतर्फ प्रथम, द्वितीय, तृतीय र सान्त्वना स्थान हासिल गर्ने टिमले क्रमशः १ लाख, ७५ हजार, ५० हजार र ३० हजार रुपैयाँ नगदसहित सिल्ड, मेडल र प्रमाणपत्र प्राप्त गर्नेछन् । यस्तै, महिलातर्फ प्रथम हुनेलाई ५० हजार, द्वितीयलाई ४० हजार, तृतीयलाई ३० हजार र सान्त्वना स्थान प्राप्त गर्ने टिमलाई २० हजार रुपैयाँ पुरस्कार प्रदान गरिने आयोजकले जनाएको छ । यसअघि फागुन ५ देखि ७ गतेसम्म सञ्चालन हुने भनिएको यो प्रतियोगिता निर्वाचनका कारण रोकिएको थियो । मन्थली नगरपालिकाका १४ वटै वडाका खेलाडीहरूले यस प्रतियोगितामा सहभागिता जनाउनेछन् ।
