मन्थली नगरपालिका नगर खेलकुद विकास समितिको आयोजनामा भएको चौथो मन्थली नगर कप रनिङ शिल्ड पुरुष भलिबल तथा दोस्रो मन्थली नगर कप महिला भलिबल प्रतियोगिता २०८२ भव्य रूपमा सम्पन्न भएको छ । मन्थली माविको खेलमैदानमा चार दिनसम्म चलेको उक्त प्रतियोगितामा विभिन्न वडाहरूका टिमले उत्साहजनक सहभागिता जनाएका थिए ।
प्रतियोगिताको पुरुषतर्फ मन्थली नगरपालिका वडा नं ८ चिसापानीले प्रथम स्थान हासिल गर्दै उपाधि चुम्न सफल भएको छ । चिसापानीले नगद १ लाख रुपैयाँसहित शिल्ड, मेडल र प्रमाणपत्र प्राप्त गरेको छ । त्यसैगरी वडा नं। ७ भटौलीले द्वितीय स्थान हासिल गर्दै ७५ हजार रुपैयाँ, वडा नं। ११ नाटिलाले तृतीय स्थान प्राप्त गर्दै ५० हजार रुपैयाँ र वडा नं। १ मन्थलीले सान्त्वना स्थान हासिल गर्दै नगद ३० हजार रुपैयाँ पुरस्कार प्राप्त गरेका छन् ।
यता महिलातर्फको प्रतिस्पर्धामा वडा नं। ७ भटौलीले प्रथम स्थान हात पार्दै नगद ५० हजार रुपैयाँसहित शिल्ड र मेडल जितेको छ । प्रतियोगितामा वडा नं। ८ चिसापानी द्वितीय हुँदै ४० हजार, वडा नं। १ मन्थली तृतीय हुँदै ३० हजार र वडा नं। १३ फुलासीले सान्त्वना स्थान प्राप्त गर्दै २० हजार रुपैयाँ पुरस्कार प्राप्त गरेका छन् । प्रतियोगिताको समापन समारोहमा बोल्दै नगरप्रमुख लब श्रेष्ठले खेलकुदको माध्यमबाट नगरलाई देशव्यापी रुपमा परिचित गराउन र समृद्ध मन्थलीको आकांक्षालाई टेवा पुर्याउने उद्धेश्यले प्रतियोगिता आयोजना गरिएको बताउनु भयो । उहाँले अन्य क्षेत्रसँगै खेलकुदको विकास र लगानीमा नगरको कुनै कमी नराखेको बताउँदै यस्ता प्रतियोगिताहरुले खेलाडी उत्पादनमा सघाउ पुग्ने बताउनु भयो । त्यसैगरी नगर खेलकुद विकास समितिका अध्यक्ष गोपाल माझीले प्रतियोगितामा सहभागी सम्पूर्ण खेलाडीहरूलाई हार्दिक धन्यवाद व्यक्त गर्दै आगामी दिनमा पनि यस्ता खेलकुद गतिविधिले नगरको खेल क्षेत्रलाई थप चलायमान बनाउने विश्वास व्यक्त गर्नु भयो ।
