रामेछाप । कोरोना संक्रमणको बहानाबाजी गर्दै मन्थली माध्यमिक विद्यालयको व्यवस्थापन समिति गठनमा ढिलो गर्न प्रपञ्च रचेको गुनासो अभिभाबकहरुले गरेका छन् ।
मन्थली माध्यमिक विद्यालयमा यसअघि गठन भएको विद्यालय व्यवस्थापन समिति अवैद्यानिक भएको भन्दै उक्त समितिलाई मन्थली नगर शिक्षा समितिले खारेज गरेपछि स्थानिय अभिभावक श्याम सुबेदीको अध्यक्षतामा तर्दथ समिति गठन गरेको हो । नगर शिक्षा समितिले तीन महिना भित्र विद्यालय व्यवस्थापन समिति गठन गर्ने गरि तर्दथ समितिलाई जिम्मेवारी दिएको थियो ।
समितिले यहीँ माघ ४ गते अभिभावकहरुको भेला गरि नयाँ व्यवस्थापन समिति गठन गर्ने निर्णय गरेता पनि कोरोना महामारीका कारण उक्त निर्णय प्रभावित बन्न पुगेको हो । कोरोनाका कारण विद्यालय व्यवस्थापन समितिको चयन हुन नसकेको विद्यालय व्यवस्थापन समितिले बताएता पनि अभिभावकहरुले भने समयसिमा बढाउने खेल खेलेको अडकलबाजी गर्दै आएका छन् ।
विद्यालयमा रिक्त रहेको व्यवस्थापन समिति गठन चाडै गर्नुपर्नेमा त्यसो नगरी कहिले अभिभावकहरुलाई परिपत्र गर्न बाँकी छ भन्दै कहिले कोरोना महामारी देखाउँदै ढिलो गर्नुमा केही षडयन्त्र हुनसक्ने आंशा उब्जिएको अभिभावक होमवहादुर थापाले जानकारी दिए । उनले भने– व्यवस्थापन समिति नहुँदा विद्यालयमा गर्नुपर्ने धेरै कामहरु अधुरै रहेका छन् । ती कामहरु पुरा गर्न जतिसक्दो चाडो रिक्त रहेको समितिलाई पूर्णता दिनुपर्ने हुन्छ । वरु तर्दथ समितिले विद्यालयमा नियमित चासो दिने र सक्रिय केही अभिभावकलाई बोलाएर समिति गठन गर्न पनि सक्ने तर्क खड्काले गरेका छन् ।
कोरोना महामारीका कारण विद्यालय व्यवस्थापन समिति गठन गर्न समस्या भएको मन्थली माध्यमिक विद्यालयका प्रधानाध्यापक टंकप्रसाद दाहालले जानकारी दिए । उनले भने– हामीले समिति गठनको लागि माघ ४ गते अभिभावकहरुलाई खबर गरेका थियौ । कोरोनाका कारण त्यो भेला हुन सकेन । मन्थली नगरपालिकासँग समन्वय गरेर फागुन २÷३ मा विद्यालय व्यवस्थापन समितिको भेला डाँकी समितिलाई पूर्णता दिन सकिन्छ की भनेर त्यसको गृह कार्यमा आफु लागि परेको प्रधानाध्यापक दाहालले बताए ।
मन्थली माध्यमिक विद्यालय मन्थलीको विद्यालय व्यवस्थापन समिति गठन गर्न दिएको समयसिमा सकिएको र पुनः उक्त समितिलाई के–कती समय थप गर्न सकिन्छ यस बिषयमा नगर शिक्षा समितिको छलफल पछि व्यवस्थापन समिति गठनको लागि मिति तय गरिने मन्थली नगरपालिका शिक्षा शाखा प्रमुख हेमन्त बुढाथोकीले जानकारी दिए ।
