रामेछाप । मन्थली खानेपानी उपभोक्ता समितिको अध्यक्षमा मन्थली खानेपानी उपभोक्ता समितिका सचिव जयप्रकाश श्रेष्ठ र सदस्य पूर्णबहादुर सुबेदीको नाम चर्चामा रहेको छ ।
यसअघिका समितिका अध्यक्ष लगाएत सबै सदस्यहरुको पदाबधि सकिएपछि रिक्त रहेकाे ती पदमा मन्थली खानेपानी उपभोक्ता समितिको शनिवार हुने २० औं साधारणसभा मार्फत नयाँ समिति समेत चयन गर्ने भएको हो । मन्थली खानेपानी उपभोक्ता समितिको स्थापना कालदेखी निरन्तर रुपमा अध्यक्ष पदमा रहेर काम गर्दै आएका रामचन्द्र बियोगीले यसवर्षवाट अध्यक्ष पदमा नबस्ने जनाएपछि सो पद लगाएत अन्य समितिको पदहरुमा निर्वाचन हुन लागेको हो ।
मन्थली खानेपानी उपभोक्ता समितिको सचिव पदमा रहेर लामो समयदेखी काम गर्दै आएकाले अबको अध्यक्ष पदमा आफ्नो पालो आएको मन्थली खानेपानी उपभोक्ता समितिका सचिव जयप्रकाश श्रेष्ठले जानकारी दिए । उनले भने– पूर्व अध्यक्ष रामचन्द्र बियोगी (बा) बस्नु हुन्छ भने म उहाँलाई सम्मानपूर्वक छोड्न तयार छु । यदी उहाँ नउठ्ने नै हो भने अब मेरो पालो भनेको अध्यक्ष नै हो, यसबाट म पछि हट्दिन् ।
त्यसैगरी सोही उपभोक्ता समितिको सदस्य पदमा रहेर लामो समयदेखी काम गर्दै आएका पूर्णपबहादुर सुबेदीले पनि अध्यक्ष पदमा उम्मेदवारी दिने जानकारी दिए । उनले भने– समितिमा लामो समयदेखी निरन्तर रुपमा लागि परेर सदरमुकाम मन्थलीको खानेपानीको समस्याको समाधानको लागि आफु अहोरात्र खटिरहेकाले यसपटक अध्यक्ष पदमा आफ्नो उम्मेद्वारी दिने र अध्यक्ष पद कुनै हालतमा पनि नछाड्ने बताए ।
त्यस्तै समितिको कोषाध्यक्षमा समितिका सदस्य कृष्णबहादुर बस्नेतको नाम चर्चामा रहेको छ । उनले लामो समयदेखी सो समितिको सदस्य पदमा रहेर काम गर्दै आएका छन् । यसवाहेक समितिको उपाध्यक्ष, सचिव र सदस्यहरुको नाम भने अहिलेसम्म चर्चामा आएको छैन् । समितिले साधारणसभामा कसरी गर्ने भन्ने बिषयमा शुक्रवार समितिको कार्यालयमा पदाधिकारीसँग छलफल गराउने श्रोतले जनाएको छ ।
मन्थली खानेपानी उपभोक्ता समिति मार्फत दैनिक खानेपानी उपभोग गर्दै आएका ९ सय ४२ जना सदस्यहरु रहेका छन् । जसमध्ये व्यक्तिगत धारा जडान गर्ने संख्या ८ सय ९२ जना रहेका छन् भने सरकारी कार्यालयमा धारा जडान भएको संख्या ३५ वटा रहेको छ । यसवाहेक सदरमुकाम मन्थलीमा रहेका विभिन्न संघ÷संस्थाहरुमा धारा जडान भएको संख्या १४ वटा रहेको छ भने अत्तिरिक्त सार्वजनिक धारा १ वटा रहेको मन्थली खानेपानी उपभोक्ता समिति रामेछापले जनाएको छ ।
उपभोक्ता समितिको शनिवार हुने २० औं साधारणसभामा २०७७ साल मंसीर महिनासम्म खानेपानी उपभोग गर्दा उठेको महशुल रकम नतिर्ने सदस्यहरुलाई साधारणसभामा प्रबेशमा रोक लगाउने भएको छ । मंसीर महिनासम्म खानेपानीको महशुल रकम नतिर्ने सदस्यहरुलाई मतदान प्रक्रियामा समेत सहभागीता जनाउन नपाउने भएका हुन् ।
मन्थली खानेपानी उपभोक्ता समितिले आफ्ना सबै उपभोक्ताहरुलाई खानेपानी उपभोग गरे बापतको रकम तिर्न मौखिक तथा लिखित रुपमा पटक–पटक ताकेता गर्दा समेत रकम नबुझाएकाले साधारणसभामा सहभागीता गराउन वञ्चित गरिएको सो समितिले जनाएको छ । साधारणसभामा मंसिर महिनासम्मको खानेपानीको शुल्क बुझाउने सदस्यहरुले मात्रै सो सभामा सहभागीता जनाउन पाउने भएका हुन् ।