मेरो प्रदेश डेक्स
मन्थली, भाद्र २५
अन्य दिन सवारी साधन र सर्वसाधारणको कारण चहलपहल हुने मन्थली बजार बुधबार सुनसान देखिएको छ । जिल्लामा शान्ति सुरक्षा कायम राख्न जिल्ला प्रशासन कार्यालयले निषेशाज्ञा (कफ्र्यू) लगाएपछि बजार सुनशान बनेको हो ।
जेनजी आन्दोलन नियन्त्रण गर्न र आपराधिक गतिविधि हुन नदिन नेपाली सेना परिचालन गरी कफ्र्यू लगाइएपछि बजारको चहलपहल हराएको छ ।
कफ्र्यू लागेपछि सवारीसाधनहरु चल्न सकेका छैनन्, सर्वसाधारणको आवातजावत रोकिएको छ । कफ्र्यूका कारण व्यापारव्यवसाय प्रभावित भएको छ । यसैगरी मजदुरी गरी छाक टार्नेहरुलाई कफ्र्यूको प्रत्यक्ष असर परेको छ । बजारमा रहेका सरकारी कार्यालयहरु पुरै बन्द छन्, भने शैक्षिक संस्थाहरु पनि ठप्प छ । यस्तो विषम परिस्थितिमा जिल्लाको शान्ति सुरक्षा कायम राख्न सयौँ नेपाली सेना, नेपाल प्रहरी र शसस्त्र प्रहरी परिचालन भएको स्थानीयले बताएका छन् । त्यसै प्रहरीले माइकमार्फत अत्यावश्यक काम बाहेक घरबाट बाहिर ननिस्कन सर्वसाधारणलाई अनुरोध गरिरहेको छ ।
जेनजी आन्दोलनले देशमा बितण्डा मच्चाइरहेको बेला रामेछापमा पनि यसको प्रभावले आपराधिक गतिविधि हुन सक्ने सम्भावनालाई मध्यनजर गर्दै जिल्ला प्रशासन कार्यालयले गएरातिदेखि कफ्र्यू लगाएको हो । जिल्ला प्रशासन कार्यालयले बिहान सूचना मार्फत गएराति १० बजे देखि सुरु भएको कफ्र्यू आज दिउँसो १२ बजे सम्म रहने जानकारी दिएको छ । परिस्थितिको मुल्यांकन गरी निषेशाज्ञा थप्ने वा हटाउने निर्णय गरिने प्रमुख जिल्ला अधिकारी थापाले बताए ।
मन्थली नगरपालिका वडा नं. २ आकासे पुलदेखि दक्षिणतर्फ मन्थली नगरपालिका र रामेछाप नगरपालिका वीचको सुकाजोर खोला पुल (बिटारसम्म ), मन्थली खुर्कोट सडक खण्डको सोलमारीस्थित सुकाजोर खोला पुलदेखि मदनआश्रित चोक हुँदै सानीमदौ सीटिइभिटिइसम्म), मन्थली नगरपालिका वडा नं. १ का सबै क्षेत्र र रामेछाप नगरपालिका वडा नं. ८ भंगेरी देखि गौरीशंकर मा.वि. तथा रामेछाप अस्पताल क्षेत्रभित्र कफ्र्यू लगाइएको छ ।