रामेछाप । जिल्लाको सदरमुकाम मन्थलीमा रहेको मन्थली नगर अस्पतालले विभिन्न कार्यक्रम गरी तेस्रो वार्षिक उत्सव शनिवार मनाएको छ । अस्पतालले आफ्नो तेस्रो वार्षिक उत्सवको अवसरमा खुला म्याराथन प्रतियोगिता, अस्पतालका बिरामीलाई फलफूल वितरण, रक्तदान गर्नका साथै उत्कृष्ट कर्मचारी सम्मान लगायत कार्यक्रम आयोजना गरेको छ । खुला म्याराथन प्रतियोगिता मन्थलीको भैंसेश्वर स्थित रण जोर खोला पुलबाट आकाशे पुलसम्म गरिएको थियो । कार्यक्रमको उद्घाटन गर्दै प्रतिनिधि सभा सदस्य एव नेपाली काँग्रेसका सभापति पूर्णबहादुर तामाङ९कान्छाराम० ले मन्थली अस्पतालको व्यवस्थापनका लागि सङ्घीय र प्रदेश सरकार सँग सहयोगको अपिल गर्ने बताएका छन् । प्रतिनिधि सभा सदस्य कान्छारामले अस्पतालको विकासका लागी नगरपालिकाले मात्र सबै खाले विकास गर्न नसक्ने भन्दै सङ्घीय सरकार र प्रदेश सरकारले के गर्न पर्ने हो आफू सरकार सँग अनुरोध गर्न तयार रहेको बताए ।
जिल्लाको सदरमुकाममा रहेको अस्पताल भएकोले रामेछापको सबै स्थानीय तह र दोलखा ओखलढुङ्गा जिल्लाको बिरामीहरूको समेत केन्द्र भएकोले यस अस्पताललाई प्रदेश स्तरीय अस्पताल बनाउन सबै लागी पर्नु पर्ने बताए । कार्यक्रममा बागमती प्रदेश प्रतिनिधि तारानारायण श्रेष्ठ, युवराज चैलागाई, आनन्द कुमार श्रेष्ठ लगायतले अस्पतालको विकासका लागी आफूहरू लागी पर्नै बताएका छन् ।
त्यस्तै गरी मन्थली नगरपालिका प्रमुख लव श्रेष्ठले शिक्षा र स्वास्थ्यमा राजनीति कसैले पनि गर्न नहुने बताए । मन्थली अस्पतालको विकासको लागि सबैले सकेको सहयोग गर्नुपर्नेमा श्रेष्ठले जोड दिए । अस्पताल लगायत मन्थली नगरपालिकाका स्वास्थ्य संस्था निर्माणको क्रममा अहिले पनि समस्या भएको बताउँदै उ जनप्रतिनिधिलाई पनि खबरदारी गरिदिन श्रेष्ठले आग्रह गरे ।
मन्थली नगरपालिका स्वास्थ्य शाखा प्रमुख केशवराज फुयाँले २०७८ माघ २७ गतेदेखि मन्थली प्राथमिक स्वास्थ्य केन्द्रलाई १५ शय्याको अस्पतालका रूपमा विकास गरी सञ्चालन गरिएको बताए । अहिले यो मन्थली अस्पतालमा पाँच जना चिकित्सक सहित ५५ जना कर्मचारी रहेको उल्लेख गर्दै अस्पतालले २४ घण्टे इमर्जेन्सी सेवा र शल्यक्रिया सहितको प्रसूति सेवा उपलब्ध गराउँदै आएको बताएका छन् ।
