काठमाडौँ। नेपाली कांग्रेसमा १५औँ महाधिवेशनको मिति र प्रक्रियालाई लिएर मतभेद चुलिँदै गएपछि डा. शेखर कोइराला पक्ष आन्तरिक छलफलमा जुटेको छ। महामन्त्रीद्वय गगन थापा र विश्वप्रकाश शर्माले कार्यसम्पादन समिति बैठकमा फरक मत राखेपछि शेखर पक्षले आगामी रणनीतिबारे धारणा तय गर्न बैठक आयोजना गरेको हो।
विशालबजारस्थित डा. कोइरालाको सचिवालयमा जारी छलफलमा पार्टी उपसभापति धनराज गुरुङ, सहमहामन्त्रीद्वय जीवन परियार र बद्री पाण्डे, केन्द्रीय सदस्यहरू बलबहादुर केसी, मिनेन्द्र रिजाल, सञ्जय गौतम, डा. गोविन्द पोखरेल, सरिता प्रसाईँलगायत ४० भन्दा बढी केन्द्रीय सदस्य सहभागी छन्।
पार्टी केन्द्रीय कार्यालय सानेपामा शुक्रबार दिउँसो बसेको कार्यसम्पादन समिति बैठकले आगामी वैशाख २८ देखि ३१ गतेसम्म १५औँ महाधिवेशन गर्ने निर्णय बहुमतले गरेपछि पार्टीभित्र असन्तुष्टि देखिएको हो। उक्त निर्णयमा महामन्त्रीद्वयसहित पाँच जनाले फरक मत राखेका थिए।
फरक मत राख्नेमा सहमहामन्त्री फरमुल्लाह मन्सुर तथा कार्यसम्पादन समिति सदस्यद्वय अर्जुननरसिंह केसी र उमा रेग्मी रहेका छन्। उनीहरूले महाधिवेशनको मिति र तयारी प्रक्रियामाथि पुनर्विचार आवश्यक रहेको धारणा राख्दै आएका छन्।
१४औँ महाधिवेशनमा शेखर–गगन समूह एक भएर प्रतिस्पर्धा गरे पनि १५औँ महाधिवेशनको सन्दर्भमा उनीहरूबीच हालसम्म स्पष्ट सहकार्य देखिएको छैन। यसले कांग्रेसभित्र गुटगत समीकरण फेरिने संकेत देखिएको छ।
यसैबीच, महामन्त्री थापाले पुसभित्र विशेष महाधिवेशन हुने सम्भावना रहेको अभिव्यक्ति दिएपछि पार्टीभित्र थप अन्यौलता सिर्जना भएको छ। यस्तो परिस्थितिमा शेखर पक्षको छलफललाई आगामी राजनीतिक कदमका दृष्टिले महत्त्वपूर्ण रूपमा हेरिएको छ।
