वीरगञ्ज । पर्साका प्रमुख जिल्ला अधिकारी (प्रजिअ) गणेश अर्यालले वीरगञ्ज महानगरपालिकाका मेयर राजेशमान सिंहसँगको विवादका कारण आफ्नो सरुवा भएको दाबी गरेका छन् ।
गृह मन्त्रालयले उनलाई अन्यत्र सरुवा गरेपछि शुक्रबार जिल्ला प्रशासन कार्यालयमा आयोजित पत्रकार भेटघाटमा अर्यालले मेयरसँग सहकार्य गर्ने वातावरण नबनेका कारण काम गर्नै नसक्ने अवस्था आएको बताए । उनका भनाइमा, प्रशासन र महानगरबीच सहमति भए पनि मेयरले पछि आफ्नो स्वार्थअनुसार निर्णय बदल्ने गरेका थिए, जसले वीरगञ्जको सामाजिक सद्भावमा नकारात्मक असर पारेको थियो ।
‘काम गर्ने वातावरण दिन नसकेपछि समयावधि नपुग्दै सरुवा हुनुपर्यो,’ उनले भने, ‘तर आफ्नो १० महिनाको कार्यकालमा नागरिकलाई सेवा प्रवाहमा कुनै कमी हुन दिइएन ।’
अर्यालले स्थानीय भाषामा सूचना प्रकाशनदेखि हेल्प डेस्क स्थापना गरेर सेवा सहज बनाउन प्रयास गरेको बताए । त्यस्तै, भारत–नेपाल सीमा हुँदै प्रवेश गर्ने भारतीय नागरिकलाई जाँचको बहानामा हुने अनावश्यक झन्झट अन्त्य गर्ने योजना बनाए पनि भन्सार कार्यालयका कारण एकीकृत सुरक्षा प्रणाली लागू गर्न नसकिएको उनले उल्लेख गरे । गत कार्तिक दोस्रो सातामा पर्सा आएर कार्यभार सम्हालेका अर्यालको कार्यकाल मेयरसँगको विवादका कारण चर्चित बनेको छ ।
