रामेछाप । आधुनिक तरिकाले मेसिन बाट दुना टपरी बनाउने तालिम रामेछाप नगरपालिकामा सुरु भएको छ । रामेछाप नगरपालिका सँगको समन्वयमा बिजनेस एन्ड प्रोफेसनल वमेनको आयोजना ७ दिने दुना टपरी बनाउने तालिम सुरु भएको हो । तालिममा नगरका १० जना महिलाहरूको सहभागिता रहेको छ ।
तालिमको उद्घाटन गर्दै रामेछाप नगरपालिकाकी उपप्रमुख बाला कुमारी कार्कीले आधुनिक मेसिन बाट दुना टपरी बनाउने तालिमले महिलालाई स्वरोजगार गनाउन सहयोग गर्ने बताइन् । उपप्रमुख कार्कीले भनिन् –हाम्रो जङ्गलमा सालको पात प्रशस्त छ । ती सबै पातहरू झरेर खेर गएको छ । प्रयोगमा आउन सकेको छैन । अब यो तालिम पछि व्यावसायिक रूपमा यो पेसालाई अघि बढाउन आग्रह गर्दछु । हाम्रो जङ्गलमा सालको पात खेर गएको छ । हामी काठमाण्डौं लगायत ठुला सहर बाट खरिद गर्ने गरेका छौँ । अब रामेछाप नगरपालिकाले जिल्ला भरी सहजै यो तालिम पछि आवश्यक दुना टपरी खपत गर्न सक्ने र महिला दिदी बहिनी स्वरोजगार बन्नेमा आफू विश्वस्त रहेको बताइन् ।
रामेछाप नगरपालिकाका प्रमुख प्रशासकीय अधिकृत मित्र प्रसाद घिमिरेले नगरलाई प्लास्टिकमुक्त मात्र नभएर दुना टपरीबाट महिलाहरूलाई आत्मनिर्भर बनाउन तथा रोजगारी सिर्जना गर्न र वातावरण प्रदूषण कम गर्न दुना टपरी बनाउने तालिमको आयोजना गरिएको जानकारी दिए । तालिम सिकेर उद्यमी बन्न चाहनेलाई नगरले सहयोग गर्ने घिमिरेको भनाई छ ।
उद्योग तथा वाणिज्य कार्यालय रामेछापका प्रमुख सुबोध कुमार साह कर्मयोगीले कम लगानीमै स्थानीय स्रोत साधन प्रयोग गरेर दुना टपरी उद्योग सञ्चालन गर्न सके महिलाहरू स्वरोजगार बन्ने बताए । उनले दुना टपरी बिक्रीका लागी बजारको समस्या नरहेको बताए । उद्योग सञ्चालन गर्न चाहनेलाई उद्योग तथा वाणिज्य कार्यालयले सहयोग गर्ने उनको भनाई छ ।
कार्यक्रममा रामेछाप नगरपालिका ८ का वडाध्यक्ष सन्तोष तामाङले सालका दुना टपरी प्रयोगले मानिसको स्वास्थ्य र वरपरको वातावरण पनि स्वच्छ हुने बताए । नगरपालिकाले मेसिन यस भन्दा पहिला खरिद गरिसकेको छ ।
