रामेछाप । खाँडादेवी गाउँपालिका वडा नम्बर ६ माकादुममा ५ हजार कागतीको बिरुवा वितरण गरिएको छ । मातृभूमि नेपाल नामक संस्थाको सहयोगमा खाँडादेवी गाउँपालिका वडा नम्बर ६ ले प्रति घर १० देखी २० वटा सम्म बिरुवा वितरण गरेको हो । वडाका नागरिकहरूको आर्थिक समृद्धि गराउने लक्ष्यका साथ ५ हजार कागतीका बिरुवा वितरण गरेको वडा अध्यक्ष नारायण कार्कीले बताए ।
मङ्गलवार बिहान संस्था सँगको सहकार्यमा प्रति परिवार १० देखी २० वटाका दरले उपलब्ध गराएको वडा अध्यक्ष कार्कीले बताए । वडा अध्यक्ष कार्कीले भने कागती मय वडा बनाउने लक्ष्य सहित यो वर्ष ५ हजार बिरुवा वितरण गरिएको छ । आवश्यकताको आधारमा अझै वितरण गर्न सकिन्छ अध्यक्ष कार्कीले भने । कागती मात्र हैन भूगोल र हावापानी मिल्ने अन्य जातका बिरुवा पनि हामी नागरिकलाई उपलब्ध गराउने छौँ । यो बिरुवा पहिलो पटक कति बचाउन सकिन्छ यो वर्ष हेरौँ त्यस पछि अन्य थप बिरुवाको व्यवस्थापन वडा र म आफैले के गर्न सकिन्छ गर्ने छौँ अध्यक्ष कार्कीले भने ।
त्यस्तै गरी मातृभूमि नेपाल नामक संस्थाका जिल्ला उपाध्यक्ष युवराज श्रेष्ठले केन्द्रले ६ हजार ७ सय ४३ वडामा ६७ लाख ७६ हजार ९ सय ४४ वटा कागतीको बिरुवा वितरण गर्ने लक्ष्य लिएको र सोही अनुसार जिल्लाको अन्य वडाहरूमा समेत वितरण गर्ने तयारी भएको बताए । उपाध्यक्ष श्रेष्ठले भने “संस्थाले जिल्लामा पहिलो पटक खाँडादेवी गाउँपालिका वडा नम्बर ६ माकादुम सँगको सहकार्यमा ५ हजार कागतीको बिरुवा वितरण भएको छ । अब हामी अन्य वडामा पनि माग भए अनुसारका बिरुवा सहकार्य गरी वितरण गर्ने छौँ । त्यसका लागी रामेछापलाई सहयोग गर्न केन्द्र तयार छ“ ।
केन्द्रीय अध्यक्ष रण बहादुर चन्दले भने “ हामीले बिरुवा दान नेपालीहरूको महा–अभियान ” भन्ने नाराको साथ नेपाललाई हरियाली नेपाल बनाउन लागेका छौँ ।
मानिसको अस्तित्व राख्न प्रकृतिको ठुलो योगदान रहने हुँदा हामीले भूगोल सुहाउँदो बिरुवाहरू वितरण गर्दै आएका छौँ । मागको आधारमा अन्य वडा हरूमा समेत वितरण गर्न हामी सहयोग गर्ने छौँ ”।
