काठमाडौँ । ललिता निवासको सरकारी जग्गा हिनामिना प्रकरणमा पूर्व प्रधानमन्त्री देय माधवकुमार नेपाल र डा. बाबुराम भट्टराईसँग नेपाल प्रहरीको केन्द्रीय अनुसन्धान ब्युरो सीआईबीले बयान कागज गराएको छ । सीआईबीले पूर्व प्रधानमन्त्री नेपाललाई आइतबार बेलुका र भट्टराईलाई सोमबार बिहान कागजी बयान गराएको हो ।
त्यसै गरी (सीआईबी)ले बालुवाटार पूर्व मन्त्री विजयकुमार गच्छदार र पूर्व राज्यमन्त्री सञ्जय साहसँग बयान लिएको छ । पक्राउ पुर्जी जारी भएका पूर्व मन्त्री चन्द्रदेव जोशीसँग पनि सीआईबीले हिजो बेलुका नै बयान लिएको छ । बालुवाटारको सरकारी जग्गा हिनामिना प्रकरणमा संलग्न भएको भन्दै सीआईबीले पूर्वमन्त्रीहरु विजय कुमार गच्छदार, चन्द्रदेव जोशी, डम्बर श्रेष्ठ तथा राज्यमन्त्री सञ्जय साहविरुद्ध पक्राउ पुर्जी जारी गरेको थियो ।
यही प्रकरणमा पक्राउ पुर्जी जारी भएका पूर्व मन्त्री डम्बर श्रेष्ठ र तत्कालीन सहसचिव नारायण गोपाल मलेको लगायतका कर्मचारी भने फरार रहेको सीआईबी स्रोतले बताएका छन् । सीआईबीका एसएसपी दिनेश आचार्यले अनुसन्धान प्रक्रिया लगभग सकिएकाले सरकारी वकिलको कार्यालयमा प्रतिवेदन बुझाउने तयारी अन्तिम चरणमा रहेको बताएका छन् ।
तत्कालीन प्रधानमन्त्री माधव कुमार नेपाल नेतृत्वको सरकारले बालुवाटारस्थित प्रधानमन्त्री निवास विस्तार गर्ने र बाहिरको जग्गा पर्खालभित्र पार्दा त्यहाँ रहेका मोहीलाई सट्टा भर्नामा जग्गा दिने निर्णय गरेको थियो । मोहीलाई सट्टा भर्ना दिनुपर्ने रायसहितको प्रस्ताव तत्कालीन भूमिसुधार मन्त्री विजयकुमार गच्छदार र सो रायसहितको मिसिल तयार पार्ने काम सहसचिव नारायण गोपाल मले गोले गरेका थिए । मोहीलाई सट्टा भर्ना दिने क्रममा हुँदै नभएको मोही खडा भएर ‘भू माफिया’को कब्जामा सरकारी जग्गा गएको पाइएपछि उनीहरू यो प्रकरणमा मुछिएका हुन् ।
