काठमाडौँ । ललिता निवास प्रकरणका मुख्य अभियुक्त शोभाकान्त ढकाललाई पुर्पक्षका लागि थुनामा पठाउन विशेष अदालतले आदेश जारी गरेको छ । विशेष अदालतले बालुवाटारस्थित ललिता निवासको सरकारी जग्गा हिनामिना प्रकरणका मुख्य अभियुक्त शोभाकान्त ढकाललाई पुर्पक्षका लागि थुनामा पठाउन आदेश दिएको हो । न्यायाधीशहरू अब्दुल अजिज मुसलमान, बालेन्द्र रुपाखेती र चन्द्रबहादुर सारूको संयुक्त इजलासले ढकाललाई थुनामा पठाउने आदेश दिएको हो ।
अनुसन्धान सुरु भएपछि फरार भएका ढकाल म्याद जारी भएको करिब एक वर्षपछि विशेष अदालतमा बुधवार हाजिर भएका थिए । अख्तियार दुरुपयोग अनुसन्धान आयोगले ढकाल विरुद्ध ३९ करोड २८ लाख र उनकी श्रीमती उमासँग ९१ लाख २० हजार बिगो माग दाबी सहित विशेष अदालतमा मुद्दा दायर गरेको थियो ।
ललिता निवास जग्गा प्रकरणमै मुछिएकी ढकाल पत्नी उमाकुमारी विशेष अदालतबाट धरौटीमा रिहा भएकी छन् । पूर्व सचिव शारदाप्रसाद त्रितालको संयोजकत्वमा बनेको छानबिन समितिले ढकालको नामै किटेर कारबाही गर्नुपर्ने सुझाव दिएको छ ।