रामेछाप । कोरोना महामारीको कारण स्थानिय प्रशासनले जिल्लाभर निषेधाज्ञा गरेपछि त्यसको सदुपयोग गर्दै मन्थली नगरपालिका वडा नं ९ पुरानागाउँका वडा अध्यक्ष बुद्धिबहादुर पुलामी मगर बारीमा मकै गोड्न ब्यस्त रहेका छन् ।
जिल्लाभर कोरोना महामारीको संक्रमण दर बढ्दै गएपछि स्थानिय प्रशासनले जिल्लाभर निषेधाज्ञा लागु गरेको छ । कोरोना संक्रमण हुने त्रासले नागरिकहरु घरभित्र बस्दै आएका छन् । जसका कारण नागरिकहरु वडा कार्यालयमा सेवा लिन आउने सेवाग्राहीको संख्या ठप्प भएपछि फुर्सदको समय सदुपयोग गर्दै वडा अध्यक्ष मगर यतिखेर मकै गोड्न खेतालाहरुसँगै आफु पनि मकै गोडेर समय कटाउन थालेका हुन् ।
गाउँघरमा यतिखेर मकै गोड्ने सिजन शुरु भएको छ । मकै गोड्ने समय भएसँगै आफु पनि मकै गोड्न व्यस्त रहेको उनले जनाएका छन् । उनले आफ्नो व्यक्तिगत फेसबुक पेजमा लेखेका छन्–“कृषि क्रान्तिबाट आत्मनिर्भर बन्न सक्ने र अक्सिजनको पनि मात्रा पुग्ने” । यतिखेर कोरोना समुदायमा फैलने क्रम बढेसँगै जिल्लाभर हिडडुलमा कमी भएको छ ।
