रामेछाप । रामेछापमा लकडाउनको मौका छोपी जर्वजस्ती करणीका घटनाको संख्यामा विगत वर्षको तुलनामा बृद्धि भएको छ ।
प्रहरी कार्यालयको तथ्याङ्क अनुसार गएको आर्थिक वर्ष २०७७÷०७८ कोरोना लकडाउनको अवधिमा मात्रै २३ वटा जर्वजस्तीका घटनाहरु घटेका छन् । जसमध्ये १६ वटा जर्वजस्ती करणी र ७ वटा जर्वजस्ती करणी उद्योग घटनाका मुद्धा प्रहरी कार्यालयमा दर्ता भएको जिल्ला प्रहरी कार्यालय रामेछापका प्रवक्ता श्रीशंकर श्रेष्ठले जानकारी दिए ।
उनका अनुसार १६ वटा जर्वजस्ती करणी मुद्धामा संलग्न १४ जना आरोपीतलाई प्रहरीले तत्काल पक्राउ गरि आवश्यक कानुनी कारवाहीको लागि नियन्त्रणमा लिएर केश चलिरहेको छ । यसवाहेक फरार रहेका २ जनाको हकमा प्रहरीले खोजी कार्य जारी राखेको छ । त्यसैगरी जर्वजस्ती करणी उद्योगमा ७ वटा मुद्धा दर्ता भएकोमा ६ जना आरोपीतलाई प्रहरीले पक्राउ गरि आवश्यक कानुनी कारवाही भइरहेको र सो मुद्धामा फरार रहेका एकजनाको खोजी कार्य जारी रहेको प्रहरी प्रवक्ता श्रेष्ठले बताए ।
प्रहरीले महिला हिंसा विरुद्ध विभिन्न जनचेतनाका कार्यक्रमहरु जिल्लाका विभिन्न स्थानिय निकाय र बस्तीबस्तीसम्म लैजाने गरेको छ । तर पनि महिला घरेलु हिंसा, जर्वजस्ती करणी, जर्वजस्ती करणी उद्योग लगाएतका घटनाहरु भने विगत वर्षको तुलनामा झनै बृद्धि हुँदै गएको तथ्याङ्कले देखाएको छ । यस बिषयमा प्रहरीले स्थानिय तहहरुसँग मिलेर थप जनचेतना मुलक कार्यक्रमहरु लिएर ग्रामिण स्तरमा लैजाने तयारी भइरहेको जिल्ला प्रहरी कार्यालय रामेछापले जनाएको छ ।
