काठमाडौं । भारतले त्रिदेशीय नाका लिपुलेकबारे नेपालको दाबीलाई अस्वीकार गरेको छ। भारतीय विदेश मन्त्रालयका प्रवक्ता रणधीर जैसवालले बुधबार विज्ञप्ति जारी गर्दै लिपुलेक हुँदै भारत–चीनबीचको व्यापार दशौँ वर्षदेखि चलिरहेको भन्दै नेपालको दाबी ऐतिहासिक तथ्य र प्रमाणमा आधारित नरहेको बताएका छन् ।
जैसवालले जारी गरेको विज्ञप्तिमा भनिएको छ, “लिपुलेक हुँदै भारत–चीनबीचको व्यापार १९५४ मै सुरु भएको हो र यो दशकौँदेखि निरन्तर चलिरहेको छ। यस किसिमका दाबीहरू ऐतिहासिक तथ्यमा आधारित छैनन्। एकतर्फी रूपमा भूभाग बढाएर दाबी गर्नु स्वीकार्य हुँदैन।”
यसअघि बुधबार नै नेपाल सरकारको परराष्ट्र मन्त्रालयले विज्ञप्ति जारी गर्दै नेपालको संविधानमा समावेश आधिकारिक नक्साअनुसार लिम्पियाधुरा, लिपुलेक र कालापानी नेपालको अभिन्न भूभाग भएको स्पष्ट गरेको थियो।
लिपुलेकबारे भारत र चीनबीच सन् २०१५ मा व्यापारिक मार्ग खोल्ने सहमति भएपछि नेपालले तत्कालै दुवै मुलुकलाई कूटनीतिक नोट पठाएर आपत्ति जनाएको थियो । त्यसयता नेपालले निरन्तर रुपमा लिपुलेक, कालापानी र लिम्पियाधुरा आफ्नो भूभाग भएको भन्दै कूटनीतिक स्तरमा दाबी गर्दै आएको छ।
विश्लेषकहरूका अनुसार, पछिल्लो भारतीय विज्ञप्तिले नेपाल–भारतबीच लामो समयदेखि रहँदै आएको सीमासम्बन्धी विवाद फेरि चर्किने संकेत गरेको छ।
