काठमाडौं – नेपाली कांग्रेसका महामन्त्री गगनकुमार थापाले भारत र चीनबीच नेपालको लिपुलेक र कालापानी क्षेत्र समेटेर भएको व्यापार सम्झौता पूर्ण रूपमा अस्वीकार्य रहेको बताएका छन्। प्रतिनिधिसभाको बिहीबारको बैठकमा विशेष समय लिएर बोल्दै थापाले दुई छिमेकीबीच भएको सम्झौतामा नेपालका स्वार्थहरू ख्यालमा राखिएको नभएको स्पष्ट पारे। ‘भारत र चीनबीच भएको भनिएको सम्झौता अस्वीकार्य छ,’ उनले भने।
थापाले सबै राजनीतिक दलहरूलाई नेपालका भू–भागको सुरक्षा र स्वाधीनतामा एकजुट हुन पनि आग्रह गरे। उनले भने, ‘यस विषयलाई घरेलु राजनीतिक खेलबाडमा नफालौँ। सबै दलहरू एकठाउँ उभिएर भन्नुपर्छ– नेपालको भूमिमा आँखा लगाउन पाईँदैन।’ उनले नेपालका सबै दलहरूलाई उक्त सम्झौताविरुद्ध एकमत हुन र राष्ट्रिय स्वाभिमानको रक्षा गर्न आह्वान गरे।
