रामेछाप । जिल्लाको लिखु तामाकोशी गाउँपालिकाकी उपाध्यक्ष दिपशीखा दाहाल र वडा नं ७ तिल्पुङका वडा अध्यक्ष शुबास बोहोरा जेल चलान हुने भएका छन् ।
उपाध्यक्ष दाहाल र वडा अध्यक्ष बोहोरालाई काठमाण्डौं जिल्ला अदालतले कैद फैसला सुनाएको हो । जिल्ला अदालत काठमाण्डौंका जिल्ला न्यायाधिश रामचन्द्र पौडेलको एकल इजलासले गाउँपालिकाकी उपाध्यक्ष दाहाललाई १ वर्ष कैद र १० हजार रुपैयाँ जरिवाना तोकेको छ । त्यसैगरी सोही पालिकाको वडा नं ७ का वडा अध्यक्ष बोहोरालाई पनि १ वर्ष कैद र १० हजार रुपैयाँ जरिवाना तोकेको छ । अदालतले दोषी ठहर गरि जेल सजाय र जरिवाना समेत तोकेपछि दुवै जना जेल जाने भएका हुन् ।
केही वर्ष पहिले लिखु तामाकोशी गाउँपालिकाका अध्यक्ष गोबिन्द बहादुर खड्कासँग सोही गाउँपालिका वडा नं ७ तिल्पुङका (मिलन) भनिने लोप्साङ लामा र अमृत तामाङले २ करोड रुपैयाँ चन्दा माग गरेका थिए । आफुहरुले माग गरेअनुसारको चन्दा रकम नदिएको खण्डमा पालिकाका अध्यक्ष खड्का र उनका परिवारका सदस्यहरुलाई समेत मार्ने सम्मको धम्की दिन लगाउने मुख्य योजनाकारको रुपमा लिखु गाउँपालिकाकी उपाध्यक्ष दाहाल र तिल्पुङका वडा अध्यक्ष बोहोराको प्रत्यक्ष संलग्नता रहेको सबुद प्रमाणको आधारमा जिल्ला अदालत काठमाण्डौंले उनीहरुलाई कैद र जरिवाना दुवै सजाय हुने गरी फैसला सुनाएको हो ।
सो घटनामा प्रत्यक्ष संलग्न भएका लिखुतामाकाशी गाउँपालिका वडा नं ७ का (मिलन) भनिने लोप्साङ लामालाई ६ वर्ष कैद र ६० हजार रुपैयाँ जरिवाना र अर्का अमृत तामाङलाई ३ वर्ष कैद र ३० हजार रुपैयाँ जरिवाना हुने फैसला जिल्ला अदालतले गरेको छ ।
फरार उपाध्यक्ष दाहाल र वडा अध्यक्ष बोहोरालाई खोज्दै प्रहरी
चन्दा असुल्ने र रकम नदिए ज्यान मार्नेसम्मको योजना बुन्ने लिखुतामाकोशी गाउँपालिकाकी उपाध्यक्ष दिपशिखा दाहाल र वडा अध्यक्ष शुबाष बोहोरालाई पक्राउ गर्न प्रहरी खोजी कार्यमा जुटेको छ ।
जिल्ला अदालत काठमाण्डौंले उनीहरु दुवैलाई उक्त घटनामा दोषि ठहर्याए देखी नै उनीहरु काठमाण्डौंमा लुकिछीपि बस्दै आएका थिए । अदालतले उपाध्यक्ष दाहाल र वडा अध्यक्ष बोहोरालाई दोषी ठहर्याएको केही हप्तापछि बिहिवार मात्रै कैद र जरिवानाको फैसला सुनाएको हो । जिल्ला अदालत काठमाण्डौंले कैद फैसला सुनाएसँगै उनीहरु दुवैलाई पक्राउ गर्न आवश्यक प्रहरी परिचालन गरिएको श्रोतले जानकारी दिएको छ ।
