नेकपा एमालेका नेता तथा आगामी बैशाख ३० गते हुन लागेको स्थानिय तहको निर्वाचनमा नेकपा एमाले बाट उम्मेदवारी दिएका कमल कडरियाले ८० प्रतिशत मतदाताले आफ्नो पक्षमा मतदान गर्ने बताएका छन् ।
लिखु तामाकोशी गाउँपालिकामा यतिबेला नेकपा एमाले, नेपाली कांग्रेस, नेकपा माओवादी केन्द्र र नेकपा समाजवादीले मुख्य गरी स्थानीय तह निर्वाचनमा अभियान तीव्र बनाएको छ । चुनावी अभियानमा लागेका लिखु तामाकोसी गाउँपालिकामा एमालेको तर्फबाट अध्यक्षका उम्मेदवार बनेका कमल कडेरिया पनि चुनावि अभियानमा रहेका छन् ।
सात वटा वडा रहेको सो गाउँपालिकामा विगतमा एमालेले गाउँपालिका अध्यक्ष, उपाध्यक्ष तथा ६ वटा वडामा विजय प्राप्त गरेको थियो । तर जनप्रतिनिधि बिचको आन्तरिक विवादको कारण गाउँपालिका विवादित बन्यो । पालिकामा विकासका कुनै काम हुन सकेनन् । अघिल्लो जनप्रतिनिधिको कार्यकाल लिखुमा विवादै विवादमा सकियो ।
यस पटक सो गाउँपालिकामा एमालेले कमल कडरियालाई अध्यक्ष र दीपा पाख्रिनलाई उपाध्यक्षको उम्मेदवार बनाएको छ । विगतका जनप्रतिनिधिको कामबाट असन्तुष्ट बनेका कार्यकर्ता र मतदातालाई आश्वस्त पर्नु र उनीहरुको मन जित्नु अहिलेका एमाले उम्मेदवारीको लागि चुनौतीको विषय बनेको छ ।
एमाले उम्मेदवार कमल कडरिया अब लिखुमा विगत नदोहोरिने प्रतिबद्धता व्यक्त गर्दै हिडेका छन् । आफू पार्टीको धारणा र घोषणापत्र भन्दा काहीँ कतै तलमाथि नहुने उनले दावी गर्दै आएका छन् ।
