लिखु तामाकोशी गाउँपालिकाका कृषकहरूलाई व्यावसायिक रूपमा आत्मनिर्भर बनाउने उद्देश्यका साथ मौरी पालन तालिम सुरु भएको छ। गाउँपालिकाको चालु आर्थिक वर्षको वार्षिक स्वीकृत कार्यक्रम अनुसार पालिकाको कृषि विकास शाखाको आयोजनामा ७ दिने कृषक स्तर व्यावसायिक मौरी पालन तालिम बुधबारदेखि सुरु भएको हो ।
तालिमको उद्घाटन पालिका अध्यक्ष केशव महत र उपाध्यक्ष दीपा पाख्रिनले गर्नु भएको थियो । स्थानीय स्तरमै उपलब्ध स्रोत र साधनको अधिकतम परिचालन गरी मह उत्पादन बढाउने र कृषकहरूको आर्थिक जीवनस्तर उकास्ने लक्ष्यका साथ यो ताािलम सुरु गरिएको हो। उद्घाटन समारोहमा गाउँपालिकाका प्रमुख प्रशासकीय अधिकृत प्रकाशराज श्रेष्ठ, अन्य कर्मचारी र कृषकहरूको उल्लेख्य सहभागिता रहेको थियो।
गाउँपालिकाका वडा नम्बर १ देखि ७ सम्मका कुल २० जना अगुवा कृषकहरूको सहभागिता रहेको यो तालिमको मुख्य प्रशिक्षकका रूपमा वरिष्ठ मौरी विज्ञ एवं नेपाल सरकारका पूर्व सहसचिव तीर्थ कुमार श्रेष्ठ रहनुभएको छ। उहाँले सहभागी कृषकहरूलाई मौरीको घार व्यवस्थापन, रानी मौरी उत्पादन प्रक्रिया, मौरीमा लाग्ने रोग तथा शत्रु जीवको नियन्त्रण र आधुनिक प्रविधि अपनाई गुणस्तरीय मह निकाल्ने विषयमा प्रयोगात्मक तथा सैद्धान्तिक प्रशिक्षण प्रदान गरिरहनु भएको छ ।
