रामेछाप – रामेछापको लिखु तामाकोशी गाउँपालिकाकी उपाध्यक्ष दिपशिखा दाहाल न्यौपाने र वडा नम्बर ७ का वडा अध्यक्ष सुवाश बोहोरालाई काठमाण्डौं जिल्ला अदालतले दोषी ठहर गरेको छ । गाउँपालिकाकी उपाध्यक्ष दिपशिखा दाहाल न्यौपाने र वडा नम्बर ७ का वडा अध्यक्ष सुवाश बोहोरा अपराधिक लाभ एक्टेक्सन मुद्धामा दोषि ठहर भएका हुन । गाउँपालिकाका अध्यक्ष गोबिन्दवहादुर खड्कालाई भने जति चन्दा नदिए गोली हानेर मार्ने धम्की दिएको आरोपमा लोप्सन भन्ने मिलन तामाङ र अमृत तामाङसगैं अभियुक्त बनाईएका उनीहरुलाई बुधबार काठमाण्डौं जिल्ला अदालतका न्यायाधीश रामचन्द्र पौडेलको इजलासले दोषी ठहर गरेको हो । उक्त मुद्धामा आरोपित तिल्पुङकै ध्रुब कार्कीलाई भने अदालतले सफाई दिएको छ ।
मुलुकी फौजदारी संहिता बमोजिम अदालतमा विचाराधिन मुद्धामा पहिलो चरणमा दोषी हो होईन भन्ने कुराको टुंगो लगाएर मात्र सजाय निर्धारण गर्ने गरिन्छ । दोषि ठहर भएपछि अब उनीहरुलाई कानुन बमोजिम अदालतले बढीमा ७ बर्ष सम्मको कैद फैसला सुनाउन सक्छ । यसअघि अदालतले उनीहरुलाई धरौटी लिएर तारेखमा छाडेको थियो ।
लिखु तामाकोशी गाउँपालिकाका अध्यक्ष खड्काले आफुलाई तामाङले २ करोड रुपैयाँ चन्दा नदिए परिवार सहितको ज्यान लिने धम्की दिएको र त्यस कार्यमा उपाध्यक्ष न्यौपाने ,वडा अध्यक्ष बोहोरा र तत्कालिन माओवादी केन्द्रका नेता ध्रुव कार्की समेतको संलग्नता रहेको भन्दै जाहेरी दिएका थिए । अध्यक्ष र उपाध्यक्ष विच फौजदारी मुद्धा चलेपछि पालिकाको काम २ बर्षदेखि अलपत्र हुँदै आएको छ ।
