रामेछाप – नेपाली कांग्रेसले आगामी फागुन २१ गते हुने प्रतिनिधि सभा सदस्य पदको निर्वाचनका लागि रामेछाप जिल्लाबाट रामचन्द्र खड्कालाई उम्मेदवार बनाउने निर्णय गरेको छ । पार्टीको केन्द्रीय निर्णयअनुसार लामो समय संगठनात्मक नेतृत्वमा सक्रिय खड्कालाई जिम्मेवारी दिइएको हो ।
कांग्रेसको उम्मेदवार छनोट प्रक्रियामा खड्कासहित पाँच जना नेताहरूको नाममा दिनभर छलफल चलेको थियो । अन्ततः संगठन निर्माण, नेतृत्व अनुभव र जिल्लामा पार्टीको आधार मजबुत बनाउन खेलेको भूमिकालाई मूल्याङ्कन गर्दै खड्कालाई टिकट दिने निर्णय गरिएको कांग्रेस स्रोतले जनाएको छ ।
टिकट पाएको विषयमा सञ्चारकर्मीको प्रश्नमा प्रतिक्रिया दिँदै खड्काले आफूलाई पार्टीले आधिकारिक उम्मेदवारको रूपमा चयन गरेको पुष्टि गरेका छन् । उनले पार्टीले दिएको जिम्मेवारीलाई गम्भीरतापूर्वक लिएको बताउँदै संगठन र जनताको विश्वासलाई मतमा रूपान्तरण गर्ने गरी चुनावी अभियान अघि बढाइने प्रतिक्रिया दिएका छन् ।
रामचन्द्र खड्का यसअघि २०७० सालमा सम्पन्न संविधान सभा सदस्य निर्वाचनमा रामेछाप क्षेत्र नं २ बाट नेपाली कांग्रेसका तर्फबाट उम्मेदवार बनेका थिए । शिक्षण पेशामा आबद्ध उनी शिक्षा क्षेत्रसँगै राजनीतिमा पनि निरन्तर सक्रिय रहँदै आएका नेता हुन् ।
खड्का नेपाली कांग्रेस रामेछापको जिल्ला सभापति भएर डेढ दशकभन्दा बढी समय नेतृत्वदायी भूमिकामा रहेर काम गरिसकेका छन् । पार्टी संगठन विस्तार, कार्यकर्ताबीच एकता कायम राख्न र जिल्लामा कांग्रेसको संगठन सुदृढ बनाउन उनको योगदान उल्लेखनीय रहेको कांग्रेसका स्थानीय नेताहरूले बताएका छन् ।
कांग्रेसले अनुभवी र संगठनमा जरा गाडेका नेतालाई उम्मेदवार बनाएसँगै रामेछापमा चुनावी माहोल थप तातेको छ ।
