काठमाडौँ, १ भदौ । वैदेशिक रोजगारीका लागि कुवेतमा कार्यरत ११ जना नेपाली श्रमिकको विषाक्त मदिरा सेवनका कारण मृत्यु भएको छ। कुवेतस्थित नेपाली दूतावासका अनुसार विषाक्त मदिरा सेवन गरेर अस्पतालमा भर्ना भएका ४० जना नेपालीमध्ये हालसम्म ११ जनाले ज्यान गुमाइसकेका छन्।
दूतावासले मृत्यु भएका १० जनाको नाम–ठेगाना पुष्टि भए पनि परिवारको आग्रहअनुसार विवरण सार्वजनिक नगरिएको जनाएको छ। मृतकहरू २२ देखि ४५ वर्ष उमेर समूहका पुरुष रहेका छन् र उनीहरू उत्पादन तथा सेवा कम्पनीमा एक वर्षदेखि पाँच–छ वर्षसम्म कार्यरत थिए।
अस्पतालमा भर्ना भएकामध्ये १५ जना आइसियुमा छन् भने १३–१४ जना सामान्य अवस्थामा उपचाररत छन्। केहीलाई डिस्चार्ज पनि गरिएको दूतावासले जनाएको छ। प्रारम्भिक रिपोर्टअनुसार सेवन गरिएको मदिरामा मेथानोल भेटिएको र त्यसकै कारण मृत्यु भएको हुनसक्ने देखिएको छ।
श्रम सहचारी गिरिप्रसाद आचार्यका अनुसार आइसियुमा रहेका धेरैजना खतरामुक्त भइसकेका छन् तर केहीको अवस्था अझै गम्भीर छ। उनले आदान, फर्वनिया र मुबारक अलकबीललगायतका अस्पतालमा उपचार भइरहेको र अस्पतालहरूले पूर्ण निको बनाएर मात्रै पठाउने प्रतिबद्धता जनाएको जानकारी दिए।
दूतावासले मृत्यु भएका नेपाली श्रमिकका शव नेपाल पठाउने तयारी सुरु गरेको छ। यसका लागि परराष्ट्र मन्त्रालयको कन्सुलर विभाग र श्रम मन्त्रालय अन्तर्गतको वैदेशिक रोजगार बोर्डसँग समन्वय भइरहेको श्रम सहचारी आचार्यले बताए।
उनका अनुसार मृतकका परिवारसँग नियमित सम्पर्क भइरहेको छ भने बिरामी भएर निको भएका नेपालीहरूको भनाइअनुसार मदिरा साथीमार्फत पिउने गरेका थिए। यो घटना एकैपटक नभई फरक–फरक स्थान र समयमा भएको भए पनि मदिरा भने एउटै स्रोतबाट उत्पादन भएको अनुमान गरिएको छ। यसबारे स्थानीय निकायले अनुसन्धान थालेको दूतावासले जनाएको छ।
