रामेछाप, ६ साउन। रामेछापको लिखुतामाकोशी गाउँपालिका–२ पुलुमा कटहर टिप्ने क्रममा रुखबाट लडेर एक महिलाको मृत्यु भएको छ।
जिल्ला प्रहरी कार्यालय रामेछापका अनुसार ओखलढुङ्गाको खिजीदेम्बा गाउँपालिका–३ घर भई हाल लिखुतामाकोशी गाउँपालिका–२ पुलुस्थित आफ्नी सानिआमा लिलामाया सुनुवारको घरमा बस्दै आएकी करिब ४८ वर्षीया लाटी सुनुवार कटहर टिप्न रुखमा चढेकी थिइन्। सोही क्रममा कटहर अचानक चुडिएर टाउकोमा लागेपछि उनी करिब १५ फिट तल भुइँमा खसेकी थिइन्।
घटनापछि उनलाई तत्काल स्थानीय शिरिषे मेडिकलमा उपचारका लागि लगिएको थियो। त्यहाँबाट थप उपचारका लागि काठमाडौं लैजाने तयारी भइरहेका बेला बुधबार दिउँसो उनको मृत्यु भएको जिल्ला प्रहरी कार्यालय रामेछापका सूचना अधिकारी कमल राउतले जानकारी दिए।
