काठमाडौँ । कतारका राजा शेख तमिम बिन हमाद अल थानी लाई त्रिभुवन विमानस्थलमा विशेष सम्मान गरेको छ । आफ्नो निजी विमान बाट दिउँसो ३ः३५ बजे त्रिभुवन विमानस्थलमा अवतरण गरेका कतारका राजा अमिर अल थानीलाई नेपालका राष्ट्रपति रामचन्द्र पौडेलले विशेष सम्मानका साथ स्वागत गरेका छन् ।
आइतबार एसियाली देशहरूको भ्रमणमा निस्केका अमिर अल थानी मङ्गलवार बङ्गलादेशबाट नेपाल आएका हुन् । अमिरको स्वागतका लागि राष्ट्रपति रामचन्द्र पौडेल सहित उपप्रधानमन्त्री तथा परराष्ट्र मन्त्री नारायणकाजी श्रेष्ठ पनि विमानस्थल पुगेका थिए । अमिरले मङ्गलवार साँझ नै शीतल निवासमा राष्ट्रपति पौडेलसँग भेटवार्ता गर्ने कार्यक्रम रहेको छ । त्यसपछि अमिर राष्ट्रपति पौडेलले आयोजना गरेको रात्रि भोजमा सहभागी हुने छन् । उनले बुधवार प्रधानमन्त्री पुष्पकमल दाहाल प्रचण्डसँग द्विपक्षीय भेटवार्ता गर्ने कार्यक्रम छ । अमिर बुधवार अपराह्न नै कतार फर्किने छन् ।
