रामेछाप । गोकुलगंगा गाउँपालिका अध्यक्ष काजीबहादुर खड्का ( दिनेश)ले गर्जाङ– खिम्ती प्रसारण लाइनमा परेको जग्गाका जग्गाधनी क्षतिपूर्ति हाल सम्म नपाएको भन्दै क्षतिपूर्तिको माग गर्दै नेपाल विद्युत् प्राधिकरणलाई ध्यानाकर्षण पत्र बुझाएका छन् । नेपाल विद्युत् प्राधिकरणले १३२ केभी गर्जाङ–खिम्ती प्रसारण लाइन निर्माण गर्ने क्रममा अधिग्रहण गर्नु पर्ने जग्गाको स्थानीय जग्गाधनीहरूले अझै क्षतिपूर्ति नपाए पछि आफूले पहल थालेको गाउँपालिका अध्यक्ष खड्काले बताए ।
प्रसारण लाइनबाट प्रत्यक्ष प्रभावित स्थानीयले अहिले सम्म क्षतिपूर्ति नपाएपछि गाउँपालिका अध्यक्ष खड्काले नेपाल विद्युत् प्राधिकरणलाई ध्यानाकर्षण पत्र बुझाएका छन् । प्राधिकरणका कार्यकारी निर्देशक कुलमान घिसिङलाई भेटेर उनले नागरिकको क्षति भएको जग्गाको क्षतिपूर्ति बापतको रकम उपलब्ध गराउन पहल गरिदिन अनुरोध गरेका हुन् ।
रामेछापको गोकुलगंगा गाउँपालिका– १ को गर्जाङबाट सुरु भई दोलखाको तामाकोशी गाउँपालिका हुँदै रामेछापकै मन्थली नगरपालिका– १३ फुलासीस्थित नयाँ खिम्ती सब स्टेसन सम्मको प्रसारण लाइन सम्पन्न भएको दुई वर्ष पुग्नै लाग्दा समेत स्थानीय जग्गाधनीहरूले क्षतिपूर्ति नपाएपछि अध्यक्ष खड्काले नेपाल विद्युत् प्राधिकरणमा नै ध्यानाकर्षण पत्र बुझाएका हुन् ।
ध्यानाकर्षण पत्रमा भनिएको छ ः गोकुलगंगा गाउँपालिका वडा नं. १, २, ३, ४ र ५ हुँदै गर्जाङ खिम्ती १३२ के.भी प्रसारण लाइन परियोजना निर्माणका क्रममा जग्गा धनीहरूले पाउनु पर्ने क्षतिपूर्ति बापतको रकम हाल सम्म पनि नपाएको जनगुनासो रहेको ब्यहोरा सर्वविधितै छ । यस कार्यालयबाट पटक पटक ताकेता गर्दा समेत सुनुवाइ नभएको हुँदा यथाशक्य जग्गाधनीहरूलाई क्षतिपूर्ति बापतको रकम उपलब्ध गराइदिन सहजीकरण गरिदिनु हुन अनुरोध छ । केही घर समेतको मुल्याङ्कन भएको तर आज सम्म पनि क्षतिपूर्ति बापत पाउनुपर्ने रकम नपाएको नागरिकहरूबाट गुनासो आइरहेको हुनाले यस कार्यालयबाट ताँहा कार्यालयका जिम्मेवार ’कर्मचारीहरूलाई पटक पटक सम्पर्क गर्दा पनि सुनुवाइ नभएको र आयोजना सञ्चालन भएको २ वर्ष हुँदा समेत नागरिकले मुल्याङ्कन अनुसारको क्षतिपूर्ति रकम समयमै नपाएकोले पीडित जनताबाट त्यस आयोजनाप्रति हुन जाने क्षतीको जिम्मेवार स्वयम् कार्यालय हुने जानकारीका लागि अनुरोध छ ।
’ध्यानाकर्षण पत्र बुझ्दै कार्यकारी निर्देशक कुलमान घिसिङले समस्या सम्बोधन गर्ने प्रतिबद्धता जनाउनु भएको छ । उहाँले एक महिना भित्र क्षतिको यकिन मुल्यांकन गरी क्षतिपूर्ति दिन आयोजना प्रमुखलाई निर्देशन समेत दिनु भएको छ, अध्यक्ष खड्काले भने । ठोसे जलाशययुक्त आयोजना निर्माण र खिम्ती–१ मा देखिएको समस्या तथा प्रभावित क्षेत्रका नागरिकहरूले पाउनुपर्ने सेयरको विषय समेत पालिका अध्यक्ष खड्काले उठान गरेका थिए । निर्देशक घिसिङले खिम्ती–१ मा देखिएको समस्या र स्थानीयले पाउने सेयरको विषयमा समेत छिट्टै निष्कर्षमा पुग्ने आश्वासन दिएका छन् ।
