रामेछाप । करदाता सेवा कार्यालय रामेछापमा कार्यरत कर्मचारी र बिचौलियाको साँठगाठ बढ्दै जाँदा करदाताहरुले सहज रुपमा सेवा पाउन नसकेको गुनासो गरेका छन् ।
करदाता सेवा कार्यालयमा दैनिक जाने सेवाग्राहीहरुले सो कार्यालयबाट सहज रुपमा सेवा पाउन नसकेको गुनासो रामेछापमा कार्यालय स्थापना भएदेखी गर्दै आएका छन् । करदाताको काम सो कार्यालयवाट हुनुपर्नेमा उक्त कार्यालयमा कार्यरत कर्मचारीहरुले बाहिर गराएर ल्याउनुस भन्दै बिचौलियाकोमा पठाउने गरेको गुनासो खाँडादेवी गाउँपालिका–३ का महेश कार्कीले जानकारी दिए ।
उनले भने– मैले आफ्नो व्यवसाय फर्म बन्द गर्न आवश्यक कागजात सहित करदाता सेवा कार्यालयमा पेश गरेको थिए । सो कार्यालयका कर्मचारीहरुले यो काम कार्यालयवाट भन्दा पनि बाहिर गराएर ल्याउनुुस् अनि मात्रै हुन्छ भने । आफुलाई यस बिसयमा केही जानकारी थिएन । मैले बाहिर काम गराउँदा बिचौलियाले मागे जति पैसा तिरेर काम त गराए । बाहिर काम सकेर कार्यालयमा पेश गरेको फायलको काम दुई दिन बितिसक्दा पनि अझै आफ्नो काम पुरा हुन नसकेको सेवाग्राही कार्कीले बताए ।
करदाता सेवा कार्यालयमा प्यान, भ्याट र करचुक्ता लगाएतका कामहरु लिएर कार्यालयमा जाँदा सो कार्यालयमा कार्यरत खरिदार नविन घिमिरेले करदाताको कामको प्रकृतीको फायल नै अध्ययन नगरी कार्यालय बाहिर व्यवसाय गरेर बसेका बिचौलियाको सिधै पठाउने गरेको गुनासो एक व्यवसायीले आफ्नो नाम नछाप्ने सर्तमा बताए ।
उनले भने– बरु हामीलाई बिचौलियाको पठाउनु भन्दा यति पैसा चाहिन्छ दिनुस् भन्दा हामी सजिलै दिने थियौं । कार्यालयमा जाँदा काम पनि नगर्ने बाहिर बिचौलियाको गएर उनीहरुले मागे जति पैसा दिनु पर्दा एकातिर पैसाको सत्यनास भएको छ भने अर्कोतिर समयको समेत बर्बादी हुँदै आएको ती व्यवसायीले गुनासो गरे ।
करदाता सेवा कार्यालयमा काम लिएर गएका धेरै व्यवसायीहरुले सहज रुपमा सेवा पाउन नसकेको भन्दै गुनासो लिएर दैनिक उद्योग वाणिज्यसंघमा आउनेको संख्यामा बृद्धि भएको रामेछाप उद्योग वाािण्ज्य संघले जनाएको छ । जिल्लामा नै करदाता सेवा कार्यालय स्थापना भएपछि सहज ढंगले व्यवसायीले सेवा सुविधा पाउँछन भन्ने जुन आशा लिएका थियौं त्यो पुरा हुन नसकेको रामेछाप उद्योग वाणिज्य संघका एका पदाधिकारीले जानकारी दिए ।
करदाता सेवा कार्यालयवाट करदाताहरुलाई दैनिक रुपमा सेवा उपलव्ध गराउँदै आएको भएता पनि करको काम अनलाइन सिस्टम मार्फत गर्नुपर्ने भएकाले उक्त काम बाहिरवाट गरेर ल्याउनुस भनेर कर्मचारीले भनेको हुनसक्ने करदाता सेवा कार्यालय रामेछापका कर अधिकृत कृष्णप्रसाद न्यौपानेले जानकारी दिए ।
उनले भने– करदाताले आफै अनलाइन सिस्टममा भर्दा पनि हुन्छ । कतिपय करदाताले अनलाइन सिस्टममार्फत भर्न नजान्दा उक्त काम बाहिर अन्य व्यक्तिवाट गराएर ल्याउनुस भनेको होला । कार्यालयका कर्मचारीहरुले बिचौलियाकोमा पठाएजस्तो आफुलाई नलागेको अधिकृत न्यौपानेले बताए ।
विभिन्न शिर्षकमा राज्यलाई बुझाउनु पर्ने कर बुझाउन जाँदा रामेछापका करदाताले दुःख व्यर्होदै आएका छन् । करदाता सेवा कार्यालयले कार्यालयमा निःशुल्क रुपमा अनलाइन सिस्टम मार्फत करदाताको कागजात अपलोड गर्ने व्यवस्था नमिलाएसम्म रामेछापका धेरै करदाताले अझै हैरानु खेप्नु पर्ने र बिचौलिया मौलाउने काम बढ्दै जाने व्यवसायीहरु बताउँछन् ।
