रामेछाप । जिल्लाको उत्तरी क्षेत्रमा पर्ने उमाकुण्ड गाउँपालिकामा विश्वभर फैलिएको दोश्रो कोरोना भाइरसका कारण गाउँभर कोरोना संक्रमित विरामीहरु बढेसँगै गाउँपालिकावाट प्रदान गरिदै आएका अधिकासं सेवाहरु प्रभावित भएका छन् ।
पालिका भित्र कोरोना संक्रमितको संख्यामा बृद्धि भएसँगै पालिकाको कार्यालयले अहिले दैनिक अत्यावश्यक काम वाहेकका अन्य कामहरु प्रभावित भएको हो । पछिल्लो समय पालिका भित्रका अधिकासं वडामा वस्ती वस्तीमा कोरोना संक्रमितका विरामीहरु देखिन थालेपछि यसलाई न्युनिकरण गर्न पालिका, वडा कार्यालयहरुले अत्यावश्यक सेवाहरु वाहेक अन्य सेवाहरुको काम रोकेको हो ।
उमाकुण्ड गाउँपालिकाको ७ वटै वडाहरुमा कोरोनो संक्रमितका विरामीहरु बढ्दै गएपछि वडा कार्यालयहरुले दुईदिनको फरकमा कार्यालय खोलेर अत्यावश्यकिय सेवाहरु प्रदान गरिएको र वाँकी अन्य वडा कार्यालयले नागरिकहरुलाई प्रदान गर्दै आएका सवै सेवाहरु बन्द गरिएको उमाकुण्ड गाउँपालिकाका निमित्त प्रमुख प्रशासकिय अधिकृत दिपेन्द्रकुमार पैकराले जानकारी दिए ।
उनले भने– कोरोना महामारी बढेसँगै पालिकाले अहिले स्वास्थ्यको क्षेत्र र विकास निमार्णका कामहरु वाहेक अन्य सवै किसिमका सेवाहरु बन्द गरिएको छ । यसअघि पालिकाले नागरिकहरुलाई दिदै आएका सेवाहरुमा विवाह दर्ता, जन्म दर्ता, मृत्यु दर्ता लगाएतका कामहरु अहिले हुन सकेको छैन् । त्यस्तै योजना निमार्णका कामहरु सम्पन्न भएता पनि ती योजनाहरुको स्थलगत अनुमगन र भुक्तानीमा समेत कोरोना महामारीका कारण समस्या भएको अधिकृत पैकराले बताए ।
पालिकाले अत्यावश्यक सेवाहरु नागरिकहरुलाई प्रदान गर्न सुरक्षा मापदण्ड अपनाएर प्रदान गर्दै आएको छ । त्यस्तै पालिकाभित्र संक्रमितहरुको संख्या बढेसँगै नागरिकहरुलाई हिड्डुलमा प्रतिबन्द लगाउनुको साथै वजारका पसल तथा होटलहरु संचालनमा पूर्णरुपमा रोक लगाइएको छ । यसअघि पर्यटकहरुको आवतजावत हुने पदमार्ग कोरोना संक्रमणका कारण ठप्प रहेको छ । नागरिकहरुको सहजताको लागि खाद्यान्न र तरकारी पसलहरु विहान निश्चित समयमा खोल्न दिने र बाँकी समय बन्द गरिएको गाउँपालिकाले जनाएको छ ।
दोश्रो लहरको कोरोनाका कारण उमाकुण्ड गाउँपालिकामा हालसम्म १ सय ५ जनालाई कोरोना संक्रमण पुष्टि भएको छ । संक्रमितहरु मध्ये हालसम्म ३७ जना कोरोनालाई जितेर घर फर्किएका छन् भने अहिले पनि ६९ जना सक्रिय कोरोना संक्रमितको होमआइसोलेसनमा बसेका छन् । त्यसैगरी पालिकामा कोरोना संक्रमण भएको र उपचारको क्रममा राजधानीमा ४ जना कोरोना संक्रमितको ज्यान गएको छ ।
कोरोना संक्रमणवाट ज्यान गुमाउनेमा उमाकुण्ड गाउँपालिका वडा नं ४ प्रिती गचेप्टेका २ पुरुष, वडा नं ७ भुजीका १ पुरुष र वडा नं २ बाम्तीकी १ महिला रहेका छन् । उनीहरुको गाउँमै कोरोना पुष्टि भएता पनि उपचारको क्रममा जिल्ला बाहिर नै ज्यान गएको हो । कोरोना संक्रमितको संख्या बढेसँगै पालिकाले २० बेडको आइसोलेसन कोभिड अस्पताल संञ्चालनमा ल्याएको छ ।
उमाकुण्ड गाउँपालिकाले प्रितीको च्यादलुमा यसअघि ५ वेडको अस्पताल संञ्चालनमा ल्याएको थियो । पछि कोरोना महामारीसँगै कोरोना संक्रमितका विरामीहरु बढेसँगै पालिकाले उक्त अस्पतालको बेड संख्या बढाएर २० पुर्याएको हो । अस्पतालमा कोरोना संक्रमितका विरामीहरुलाई अक्सिजन अभाव हुन नदिन पालिकाले २० वटा अक्सिजन सिलिण्डर खरिद समेत गरको छ । यसवाहेक पालिकाले संञ्चालन गरेको अस्पताललाई विभिन्न दाताहरुले दिएको अक्सिजन सिलिण्डर सहित हाल ४० वटा अक्सिजन सिलिण्डरहरु रहेको उमाकुण्ड गाउँपालिकाकी उपाध्यक्ष उर्मिला कार्की (बस्नेत)ले जानकारी दिइन ।
उनले भनिन्– गाउँमा कोरोना संक्रमितका विरामीहरु बढेसँगै अहिले गाउँका वस्ती वस्तीमा स्वास्थ्यकर्मीहरुको टोली पुगेर एन्टिजेन विधि र पिसिआर विधि दुवै तरिकावाट कोरोना परिक्षण गर्ने काम भइरहेको छ । त्यस्तै कोरोना संक्रमण दर बढ्न सक्ने भएकाले सबै नागरिकहरुलाई घरभित्रै वस्न र अति आवश्यक काम परेमा मात्रै घर वाहिर निस्कदा माक्स, सेनिटाइजर प्रयोग गर्न र सामाजिक दुरी कायम गर्न सल्लाह दिइएको पनि उपाध्यक्ष कार्की (बस्नेत)ले बताइन ।
