रामेछाप । अघिल्लो वर्षको कोरोना जोखिम मोलेर फ्रन्टलाइनमा काम गर्ने रामेछापका २ सय २१ जना स्वास्थ्यकर्मीहरुले एकरुपैयाँ पनि जोखिम भत्ता पाउन सकेका छैनन् ।
कोरोनाको जोखिम मोलेर नागरिकहरुको उद्धारमा खटिएका रामेछापका स्वास्थ्यकर्मीहरुले जोखिम भत्ता रकम पाउन नसक्दा उनीहरु दुःखित भएका छन् । अघिल्लो पटक आफ्नै ज्यानको बाजी थापेर अघिल्लो पक्तिंमा बसेर रातदिन नभनी काम गरेका स्वास्थ्यकर्मीहरुले सरकारले दिने भनेको जोखिम भत्ता रकम स्थानियतहले नदिएपछि पुनः दोश्रो चरणको कोरोना महामारीमा काम नफर्कने मनस्थिती स्वास्थ्यकर्मीहरुले बनाएका छन् ।
पहिलो चरणमा देखिएको कोरोना महामारीमा हामीले रातदिन नभनी नागरिकहरुको स्वास्थ्यको लागि खट्यौं । तर राज्यले दिने भनेको स्वाथ्यकर्मीहरुलाई जोखिम भत्ता एक रुपैयाँ पनि पाउन नसक्दा धेरै दुखित भएको सुनापति गाउँपालिका वडा नं ५ खनियापानी स्वास्थ्यचौकीका इन्चार्ज बिनोद मण्डलले जानकारी दिए ।
उनले भने– हामीले काम गरेको अवधिको रकम दिनुस् भनेर धेरै पटक गाउँपालिकामा धायौं । तर एक रुपैयाँ पनि कोरोनाको नाममा रकम पाउन सकेनौं । अघिल्लो वर्षकै जोखिम भत्ता नपाएपछि यसपटक आफ्नो ज्यानको वाजी थापेर कोरोनाका बिरामीको उपचारमा संलग्न नहुने इन्चार्ज मण्डलले बताए ।
जिल्लाको दोरम्वा गाउँपालिकाका ४५ जना, मन्थली नगरपालिकाका १ सय ३३ जना, सुनापति गाउँपालिकाका ४३ जना गरि २ सय २१ जना स्वास्थ्यकर्मीहरुले पहिलो चरणको कोरोना उपचारमा संलग्न हुँदाको जोखिम भत्ता रकम पाउन सकेका छैनन् । यसवाहेक जिल्ला स्वास्थ्य कार्यालय, गोकुलगंगा गाउँपालिका, उमाकुण्ड गाउँपालिका, लिखु तामाकोशी गाउँपालिका, रामेछाप नगरपालिका र खाँडादेवी गाउँपालिकामा कार्यरत स्वास्थ्यकर्मीहरु मध्ये केहीले गएको असार मसान्तसम्मको त केहीले गत असोज महिनासम्मको जोखिम भत्ता रकम बुझेका छन् ।
कोरोना महामारीको समयमा नागरिकको उपचारमा खटिने स्वास्थ्यकर्मीहरुलाई प्रदान गर्ने भनिएको जोखिम भत्ता रकम विभिन्न बहानाबाजी गर्दै नदिएपछि पुनः कोरोना महामारीका विरामीहरुको उपचारमा संलग्न हुने जाँगर मरेको प्राथमिक स्वास्थ्य केन्द्र मन्थलीमा कार्यरत स्वास्थ्यकर्मी युवराज सापकोटाले जानकारी दिए ।
दोश्रो चरणको कोरोना महामारीको रुप भयाभय बन्दै जाँदा विरामी भएको बखत उपचारमा संलग्न हुनुपर्ने बिषयमा वुधवार बोलाइएको सुनापति गाउँपालिकाको स्वास्थ्यकर्मीहरुको बैठकमा सहभागी स्वास्थ्यकर्मीहरुले अघिल्लो वर्षको जोखिम भत्ता नपाएसम्म काममा संलग्न नहुने भन्दै कर्मचारीहरु बैठकनै छाडेर हिडेको सुनापति गाउँपालिकाका स्वास्थ्य शाखाका प्रमुख अर्जुन श्रेष्ठले जानकारी दिए ।
उनले भने– कोरोना संक्रमितको रातको समयमा काम गर्ने कर्मचारीलाई खाजा खर्च वापत दैनिक ३ सय ४० रुपैयाँ दिने भनिएको छ । त्यसवाहेक कर्मचारीहरुले कोरोनाको जोखिम भत्ताको नाममा अहिलेसम्म कुनै पनि रकम पाउन सकेका छैनन् श्रेष्ठले बताए ।
यता जिल्ला स्वास्थ्य कार्यालय रामेछापमा कार्यरत ३८ जना स्वास्थ्यकर्मीहरुले पनि गत असोज महिना यता देखी कोरोना जोखिम भत्ता वापतको रकम पाउन सकेका छैनन् । पटक–पटक जोखिम भत्ताको लागि आवश्यक रकम माग गर्दा समेत पाउन नसक्दा स्वाथ्यकर्मीहरुमा नैराश्यता उत्पन्न भएको जिल्ला स्वास्थ्य कार्यालय रामेछापका प्रमुख डा.जितेन्द्रकुमार मण्डलले जानकारी दिए ।
धेरै स्वास्थ्यकर्मीहरुले कोरोनाको बहाना बनाएर काममै नगएका स्वास्थ्यकर्मीहरुले पनि रकम माग गर्ने, सुत्केरी विदामा वसेकाले पनि रकम माग गर्ने लगाएत विभिन्न गलत तरिका अपनाएर रकम माग गरेकाले स्वास्थ्यकर्मीहरुलाई दिने भनिएको जोखिम भत्ता रकम नदिएको मन्थली नगरपालिकाका कार्यकारी अधिकृत लिलाराज पौडेलले जानकारी दिए ।
उनले भने– कोरोना महामारीको समयमा फ्रन्टलाइनमा काम गर्ने कर्मचारीहरुको संख्या यकिन गरी ती कर्मचारीहरुलाई रकम दिन्छौं । तर काममै नआएका कर्मचारीहरुको हकमा भने एकरुपैयाँ पनि रकम प्रदान गर्दैनौ ।
