रामेछाप । पशुपालक किसानलाई पानी संकलन गर्न सहजता होस् भन्ने उद्धेश्यले मन्थली नगरपालिका वडा नं १ वडा कार्यालयले १५ जना किसानलाई खानेपानी ट्याङ्की बितरण गरेको छ ।
वडा कार्यालयमा भएको चालु आर्थिक वर्षको वजेटवाट १ हजार लिटरका १६ वटा खानेपानी ट्याङ्की खरिद गरी वडा कार्यालयभित्र दर्ता रहेर संचालन रहेका १५ वटा गाई फार्मका संचालकलाई र एउटा शीव मन्दीरलाई उक्त ट्याङ्की वितरण गरिएको हो । पशुुपालक किसानले खानेपानीको समस्या हुँदा पशुचौपाया पाल्न समस्या भएको भन्दै वडा कार्यालयमा खानेपानी संकलन गर्न ट्याङ्की माग गरे अनुसार उक्त ट्याङकी वितरण गरिएको हो ।
किसानहरुलाई उक्त ट्याङ्की मन्थली नगरपालिकाका प्रमुख लव श्रेष्ठ र वडा नं १ का वडा अध्यक्ष रामहरी पौडेलले एक कार्यक्रमको विच हस्तान्तरण गरेका हुन् । ट्याङ्की वितरण गर्दै प्रमुख श्रेष्ठले वडा कार्यालयले किसानको मागलाई सम्वोधन हुने काम गरी सह्रानीय काम गरेको बताए । उनले अहिले देशमा रोजगारी पाइएन भनीरहेको अवस्थामा यहाँहरुले थोरै लगानी गरेर भएता पनि आफ्नो व्यवसाय संचालन गरेर दुधमा मन्थली नगरपालिकालाई आत्मनिर्भर बनाउन सकेकोमा आफुलाई धेरै खुशी लागेको बताउँदै आगामी दिनमा पनि नगरले किसानको मागलाई सम्वोधन हुने किसिमका कार्यक्रमहरु संचालन गर्ने बताए ।
गाईपालक किसानको मागलाई सम्बोधन गरेर वडा कार्यालयले पानी संकलनको लागि रिर्जभ ट्याङ्की दिदा किसानहरुलाई थप उर्जा मिलेको मन्थली नगरपालिका–१ की निरन्जन निराकार गाई फार्मकी संचालिका डुकुना घिमिरेले बताइन । उनले भनिन्– अहिले धेरै किसानहरु अत्यन्तै समस्यामा छन् । गाईपालक किसानलाई एकातिर घाँस र दानाको समस्या छ भने अर्कोतिर पानीको । त्यही पनि दुःख सास्ती खेप्दै किसानले गाई पालन गर्दै आएका छन् । वडा र नगरपालिकाले बेलाबेलामा केही सहयोग दिदा किसानहरुलाई थप उर्जा र हौसल्ला मिल्ने भएकाले यस्ता किसिमका कार्यक्रम बेलाबेलामा संचालन गर्नुपर्ने पनि घिमिरेले बताइन ।
यसैगरी मन्थली नगरपालिकाले यस चालु आर्थिक वर्षमा वडा भित्र रहेका १० जना महिला स्वास्थ्य स्वंयसेविकालाई झोला र ब्याग वितरण गरिएको छ । त्यस्तै बाख्रा फार्म संचालन गर्दै आएका किसानलाई बोका खसी पार्न सहज होस् भन्ने उद्धेश्यले एकथान क्यास्टो मेसिन बितरण गरिएको मन्थली नगरपालिका–१ का वडा अध्यक्ष होमप्रसाद पौडेलले जानकारी दिए ।
उनले भने– हामीले किसानको मागलाई धेरै सम्बोधन गर्न नसके पनि वडाको वजेट र परिधीभित्र रहेर थोरै भए पनि विभिन्न कार्यक्रम मार्फत सहयोग गरिरहेको छौं । आगामी वर्ष पनि किसानको मागलाई सम्बोधन हुने किसिमका कार्यक्रम वडाले संचालन गर्ने पनि अध्यक्ष पौडेलले बताए ।
