रामेछाप । बिगत दुई महिनादेखी संघिय खानेपानी तथा ढल व्यवस्थापन आयोजना कार्यालय रामेछापका प्रमुख नहुँदा उक्त कार्यालयको काम प्रभावित बन्दै आएको छ ।
दुई महिना अघि संघिय खानेपानीका आयोजना प्रमुख राजेन्द्र सापकोटाको सरुवा भएर उनले जिल्ला छाडेको दुई महिना वितिसक्दा पनि संघिय खानेपानी मन्त्रालयले उनको ठाउँमा नयाँ आयोजना प्रमुख पठाउन नसक्दा जिल्लामा हुने सवै खानेपानी आयोजनाका कामहरु प्रभावित बन्दै आएका छन् । कार्यालयमा प्रमुख नहुँदा जिल्लामा संचालित दुई दर्जन भन्दा बढी खानेपानी आयोजनाका कामहरुको भुक्तानी र नयाँ कामको सम्झौता लगाएतका सबै प्रकारका कामहरु ठप्प रहेका छन् ।
कार्यालयमा लामो समयदेखी प्रमुख नहुँदा कर्मचारीहरुले दुई महिनादेखी तलव भत्ता समेत पाउन सकेका छैनन् । संघीय खानेपानी मन्त्रालयले आर्थिक कारोवार गर्ने गरी निमित्तको जिम्मेवारी समेत नदिदा कार्यालयको लेखाका सबै कामहरु ठप्प भएको संघिय खानेपानी तथा ढल व्यवस्थापन आयोजना कार्यालय रामेछापका लेखापाल नवीन केसीले जानकारी दिए ।
उनले भने– कार्यालय प्रमुख नहुँदा जिल्लामा संचालित आयोजनाको काम ठप्प भएको बिषयमा पटक–पटक सम्वन्धीत मन्त्रालयमा जानकारी गराउँदा समेत अहिलेसम्म कुनै पनि प्रमुख पठाएको छैन् । प्रमुख नहुँदा आयोजनाको दिन बाँकी रहेको भुक्तानी रकम, योजना संचालनको लागि दिनुपर्ने पेश्की रकम, नयाँ योजना सम्झौता, मर्मत संभारका योजना, कार्यालयमा कार्यरत कर्मचारीको तलव भक्ता लगाएतका कार्यहरु रोकिएको लेखापाल केसीले बताए ।