रामेछाप — रामेछापको खाँडादेवी गाउँपालिका–५, गोगनपानीस्थित ङग्युर साम्तेलिङ्ग गुम्बा तथा अध्ययन केन्द्र निर्माण कार्य चार वर्षदेखि अलपत्र परेको छ। संस्कृति, पर्यटन तथा नागरिक उड्डयन मन्त्रालयको ८० प्रतिशत र खाँडादेवी गाउँपालिकाको २० प्रतिशत आर्थिक साझेदारीमा २०७८ सालको भदौ महिनाबाट गुम्बा तथा अध्ययन केन्द्र निर्माण सुरु गरिएको थियो।
समयमै निर्माण कार्य सम्पन्न नहुँदा गुम्बाको निर्माण अधुरो मात्र छैन, निर्माण भइसकेका संरचनाहरू समेत संरक्षणको अभावमा जीर्ण बन्दै गएका छन्। तामाङ जातिको संस्कार अनुसार विवाह गर्न मिल्ने दुईवटा सुविधा सम्पन्न भवन निर्माण गर्ने लक्ष्यसहित परियोजना सुरु गरिएको थियो।
झण्डै सात करोड लागत अनुमान गरिएपनि पाँच पोखरी निर्माण सेवा प्रा.लिले तीन करोड ४८ लाख रुपैयाँमा एक वर्षमा निर्माण सम्पन्न गर्ने गरी ठेक्का लिएको थियो। तर सम्झौता अनुसार काम नगरेपछि निर्माण कार्य रोकिएको हो।
खाँडादेवी–५, पकरबासका वडाध्यक्ष मनोज पौडेलका अनुसार, ठेकेदारले तोकिएको समयभित्र काम सम्पन्न नगर्दा मन्त्रालयले भुक्तानी नै रोकेको छ। “यति ठूलो बजेट पालिकाले भुक्तानी गर्न सक्ने अवस्था छैन,” वडाध्यक्ष पौडेलले बताउनुभयो।
खाँडादेवी गाउँपालिकाका पूर्व अध्यक्ष प्रेमबहादुर तामाङका अनुसार, स्थानीय तह निर्वाचनपछि समन्वय र ताकेता नहुँदा समस्या थपिएको हो। “२०७८ भदौमा काम सुरु भयो तर ठेकेदारले काम राम्ररी गर्न सकेन। निर्वाचनपछि समन्वय हुन नसक्दा काम रोकियो,” उहाँले बताउनुभयो।
गाउँपालिका अध्यक्ष ज्ञानकुमार श्रेष्ठका अनुसार, अघिल्लो जनप्रतिनिधिको पालामा २१ लाख रुपैयाँ बजेट निर्माण व्यवसायीलाई भुक्तानी नदिई पालिकाकै सञ्चित कोषमा राखिएको थियो। महालेखा परीक्षण प्रतिवेदनले उक्त रकम दुरुपयोग भएको भन्दै सङ्घीय राजस्व खातामा फिर्ता गर्न निर्देशन दिएको छ।
अध्यक्ष श्रेष्ठले भन्नुभयो, “सम्झौताको जम्मा ३३ प्रतिशत मात्र काम भएको छ। पहिलो किस्ताको रकम दिइसकेको अवस्थामा अब थप गर्न नसकिने भन्दै ६ महिना अगाडि अर्थ मन्त्रालयबाट पत्र आएको छ।”
गाउँपालिकाले अहिले पनि निर्माण पूरा गर्ने प्रयास गरिरहेको छ। अध्यक्ष श्रेष्ठका अनुसार, आफूहरू आएको पहिलो वर्ष ४७ लाख रुपैयाँ र चालु आर्थिक वर्षमा ३० लाख रुपैयाँ बजेट विनियोजन गरिएको छ। ठेकेदारले ८५ लाख रुपैयाँ दाबी गरेपनि काम सम्पन्न नभएकाले कुनै आधार नभएको उहाँको भनाइ छ।
अब पुरानो ठेक्का तोडेर नयाँ प्रक्रियाबाट भए पनि गुम्बा तथा अध्ययन केन्द्र निर्माण सम्पन्न गर्ने सोचमा गाउँपालिका रहेको र यसका लागि संघ तथा प्रदेश सरकारसँग आवश्यक बजेट माग गरिएको अध्यक्ष श्रेष्ठले बताउनुभयो। बजेट नआए पालिकाले आफैं खर्च गरेर भए पनि निर्माण सम्पन्न गर्ने प्रतिबद्धता उहाँले व्यक्त गर्नुभयो।
